Тиімді үйлестірудің тетіктері

Кеше елордада ШЫҰ Бас хатшысы Мұратбек Иманәлиев пен БҰҰ Бас хатшысының орынбасары, БҰҰ-ның Есірткі және қылмыс жөніндегі басқармасының атқарушы директоры Юрий Федотов ШЫҰ Хатшылығы мен БҰҰ-ның Есірткі және қылмыс жөніндегі басқармасы арасындағы өзара түсіністік туралы меморандумға қол қойды. Бұл құжат есірткінің заңсыз айналымына, есірткі пайдалану­ға, халықаралық терроризмге, ұй­ым­дасқан қылмысқа, басқа да қыл­мыс түрлеріне қарсы күрес ба­рысындағы ынтымақтастыққа негізделген. Қол қою рәсімінен кейі­нгі сөзінде ШЫҰ Бас хат­шы­сы Мұратбек Иманәлиев бұл құ­жаттың алдағы уақытта аталған мә­селелер бойынша өзара әре­кет­тестікті тиімді жүзеге асыруға ық­пал ететінін атап өтті. «Бұл ме­морандумда халықаралық терроризммен, заңсыз есірткімен, ұйым­дасқан қылмыспен күрес жүргізу мәселелері қамтылған, – деді Бас хатшы. – Қылмыспен күресті бірлескен түрде жүзеге асырған тиімді. Құжат соған негіз қалайды». Ал БҰҰ Бас хатшысының орынбасары Юрий Федотов құ­жат­тың ШЫҰ мерейтойының қар­саңында бекітілгеніне тоқта­лып өтті. «Біз бұған дейінгі жылдарда да өзара іс-қимылды жүйелі түрде жүргізіп келдік, – деді Юрий Федотов осы туралы. – Енді алдымыздан жаңа мүм­кін­діктер ашылып отыр. БҰҰ-ның Есірткі және қылмыс жөніндегі басқармасы бүгінде Ауғанстан, сондай-ақ көршілес елдер үшін жаңа өңірлік бағдарламаны әзір­леу­де. Бұл бағдарламада ШЫҰ-ға әріптес ретінде ынтымақтастық­тың рөлі көрініс табатын болады. Кеше, сондай-ақ ШЫҰ Өңір­лік лаңкестікке қарсы құрылымы атқарушы комитетінің директоры Жеңісбек Жұманбеков пен ҰҚШҰ Бас хатшысы Николай Бордюжа Атқарушы комитет пен ҰҚШҰ арасындағы өзара түсіністік тура­лы хаттамаға қол қойды. Бұл құжат өңірдегі қауіпсіздік пен тұрақтылықты нығайтуға ықпал етеді. «Екі ұйым арасында қол қойылған бұл құжат, – деді Ж.Жұ­манбеков рәсім соңынан, – лаң­кес­тікпен және лаңкестікті қаржы­лан­дыруға қарсы күресті жандан­ды­руға ықпал етеді». Николай Бордюжа: «ҰҚШҰ үшін Орталық Азия өңірінде лаңкес­тік­пен күрес мәселелері ең ма­ңыз­ды бағыт­тар­дың бірі болып табылады. Бұл хаттама біздің күш-жігерімізді әрі қа­рай тиімді үйлестіруге мүмкіндік береді. Аталған проблеманың күрделі екенін жақсы білеміз»,  –  деді. Әлисұлтан ҚҰЛАНБАЙ.