Гүлмен көмкерілген көкөніс

Сұлулық пен нәзіктікті гүлмен салыстырамыз. Гүл – қуаныш сый­лайды, адам жанын нұрға бөлейді. Осындай алқызыл раушан гүлінің хош иісі аңқыған қаланың солтүс­тігінде көзге ерекше түсетін ғима­ратқа кірсеңіз, сұлулықтың сырын ұғынасыз. «Green House – Жасыл үй» жылыжай кешені 2008 жылдан бері төрт түрлі раушан гүлін өсіріп, бап­тауды қолға алған. Текелінің жай­қалған гүлдерін Астана, Алматы, Қарағандының тұтынушылары мен өзге де ірі қалалардың жұртшы­лы­ғы алады. Голландиялық технология жетістігімен күн сайын сабағы­н­ан үзіліп алынатын 4-5 мың тал хош иісті раушан гүлдері суары­лып, сосын арнайы тоңазытқышта сақталады. Сұранысқа орай кейін тұтынушыға жол тартады. Еліміздегі 2010-2014 жылдарға ар­нал­ған үдемелі индустриялық-инно­вациялық даму бағдарламасы аясында «ҚазАгроФинанс» қоғамы арқылы қар­жыландырылған 1293,7 миллион теңгеге «Green House-Жасыл үй» серіктестігі жылыжай кешенінің қо­сым­ша құрылысын да қатар жүргізуде. Текелінің әлеуметтік-экономи­ка­лық тынысын аша түсетін жоба­ның жай-күйін Индустрия және жаңа технологиялар министрлігінің Өнер­кәсіп комитеті құрылыс ин­дустриясы басқармасы жіті назарда ұстауда. Қазіргі таңда раушан гүл­дерін өсіріп, оны отандық рынокқа шығарған жылыжайға жалғастыра салынған құрылыстың біраз жұмы­сы еңсеріліп қалған. Жылыжай ке­шенінің ерекшелігі қуат көзінің тиімділігі мен жаңа технологияларды пайдалану артық­шы­лығы деуге болады. Жылыжайдың болашаққа құр­ған жоспары гүлмен емес, бастапқы тәжірибе көкөніс өсірумен ұштас­қанын да айтқан жөн. Жылыжай салудың жаңа технологиясын әбден меңгерген құрылыстың бас мердігері «Базис-СТ» серіктестігі қолға алған жобаның жалпы құны 1581,4 миллион теңге. «ҚазАгроФи­нанс­тың» жоғарыда аталған сомасынан қалған 287,7 миллионды жылыжай ұжымы көтеріп отыр. Голландиялық технологиямен са­лынған жылыжай кешенінде өсірі­ле­тін көкөніс те раушан гүлі секілді әдіспен бапталады. Биылғы қараша айынан бастап қияр мен қызанақ өсірілмекші. Жобалық қуаты жылы­на 1650 тонна қияр және 1375 тонна қы­занақ өсіру болса, өңір тұрғын­дары­ның дастарқанынан қысы-жазы көк­өніс үзілмейді деп үміттенеміз. Жұ­мыс ауқымы кеңейетін жылы­жай­да қосымша 60 адамға тұрақты жұ­мыс орны ашылып, тағы да шаһар­лық­тар еңбекке тартылатыны қуанышты. Серпінді жоба пайдалануға беріліп, ел игіліне асар күн де жақын. Осылайша экологиялық жағынан таза көкөніс түрлері дүкен сөре­лерінен орын алады. Күмісжан БАЙЖАН.