Испаниямен байланыс артады

Кеше Үкімет үйінде Қазақстан Республикасының Премьер-Министрі Кәрім Мәсімов  Испания Корольдігі Үкіметінің төрағасы Хосе Луис Родригес Сапатеромен кездесіп, екі ел арасындағы жаңа құжаттарға қол қою рәсіміне қатысты. Кездесу Испания Үкіметі төрағасының елімізге екі күндік ресми сапары аясында өтті. Еліміздің Испания Корольдігімен дипломатиялық қарым-қа­ты­нас орнаған жылдар ішінде қол жеткізген жетістіктері екі­жақ­ты байланыстың жаңа дең­гей­ге көте­рілгендігін айғақтайды. Үкі­мет басшысы Кәрім Мәсімов пен Испания Корольдігі Үкіметі­нің төрағасы Хосе Луис Родригес Са­патероның қатысуымен өткен ынтымақтастық туралы екіжақты құжаттарға қол қою рәсімі бары­сында Қазақстан және Испания мемлекеттері арасында Қыл­мыс­тық істер бой­ынша өзара құ­қық­тық көмек көрсету туралы кон­вен­цияға, Қылмысқа қарсы кү­рес­тегі ынтымақтастық ту­ралы меморандумға қол қойыл­ды. Сондай-ақ Қазақстан Президенті жа­нындағы Мемлекеттік бас­қару ака­де­миясының Дипломатия институты мен Испания Ко­рольдігі Сыртқы істер ми­нистр­­лі­гінің Дипломатия мектебі ара­сын­да Өзара түсіністік туралы  мемо­ран­думға қол қойылды. Ал «Қаз­МұнайГаз» ҰК» АҚ испан­дық «Rep­sol» компаниясымен Өз­ара түсіністік ту­ра­лы мемо­ран­дум­ға, «Қазақстан инжиниринг» ҰК» АҚ  «Индра» ком­па­ния­сы­мен  Қор­ғаныс және қауіпсіздік са­ла­сын­дағы ынтымақтастық ту­ра­­лы келісімге, сонымен қатар, «Ата­ме­кен» ҰЭП Ис­панияның кәсіпкерлік ұйым­­дары­ның конфе­де­рациясымен Өз­ара түсіністік туралы меморандумға қол қойды.  Қа­зақстанның Сауда-өнеркәсіп па­­латасы мен Испанияның Сау­да-өнер­кә­сіп пала­тасының Жоғары кеңесі қазақ­стандық-ис­пан­дық іскерлік кеңес құру ту­ра­лы келісімге келсе, «Қазақ мұнай және газ инс­титуты»  АҚ пен «Техникас Реу­ни­дас» компа­ниясы Өзара түсіністік туралы  меморандумды бекітті. Бұл құжаттарға қол қою Қа­зақстан мен Испания ара­сын­дағы түрлі сала­лардағы ынты­мақ­тас­тық­ты жоғары деңгейге көтеруде маңызды рөл атқара­тын болады. Венера ТҮГЕЛБАЙ.