12 Шілде, 2011

Ұлы актерге арналған альбом-кітап

328 рет көрсетілді
Биыл қазақ театр өнерінің негізін қалаушылардың бірі, Социалистік Еңбек Ері, КСРО һәм Қазақ КСР Мемлекеттік сыйлық­тарының лауреаты, халық әртісі Серәлі Қожамқұловтың туғанына 115 жыл толып отыр. Ел мәде­ниеті­нің осынау мерейлі оқиғасы аясында Алматыдағы Орталық мемлекеттік мұрағатта ұлы актерге арналған «Шеберлік шы­ңы» атты альбом-кітаптың тұсау­кесер таныстырылымы болып өтті. Бұл рәсімнің мұрағат мекемесінде өтетін жөні де бар екен. Алда 90 жылдығын атап өткелі отыр­ған Орталық мемлекеттік мұ­рағат басшысы Ләззат Ақ­таева­ның айтуынша, 1979 жылы Серағаң мұрағатқа өз қолынан 192 іс құжатын әкеліп тапсырған көрінеді. Содан бері С.Қожам­құлов­тың ғылыми-сараптамалық өңдеуден өткен жеке қоры мұ­рағат бөлімінде мұқият сақталып келеді. Мұнда саңлақ актер ой­наған рөлдердің мәтіндері, қол­жаз­балар, жазысқан хаттар, фотосуреттер, марапаттар, басқа да құжаттар жетерлік. Міне, атал­мыш альбом-кітапты құрас­ты­рып дайындау барысында осы жеке қордағы бай материалдарды пайдаланғандарын актердің қызы мен күйеу баласы – Рената Серәліқызы және профессор Ахмет Мұса айтып өтті. Альбом-кітап «Киізкітап» баспасынан Бай­ланыс және ақпарат министрлі­гінің қолдауымен шығарылыпты. Төрт бөлімнен тұратын альбом-кітапта сахна саңлағының өмірбаяны мен шығармашылық жолы кеңінен қамтылған деуге болады. Альбом-кітаптың көрікті әрі мазмұнды болып шығуына мұра­ғат қызметкерлерімен бірге М.Әуезов театрының ұжымы да атсалысқан. Көптеген сахна көріністері мен кино рөлдерінің суреттері, жоға­ры мем­лекеттік марапаттардың тапсы­рылу сәттері, қаншама грамоталар мен дипломдар, құт­тықтаулардың нақ осы қара ша­ңырақтан алынып берілуі аль­бом-кітаптың құндылы­ғын арт­тыра түскен. С.Қожамқұловқа арналған «Ше­­берлік шыңы» альбом-кіта­бы­мен бірге осы арада ұлы актер туралы материалдарды өмір бо­йы жинастырып, бұған дейін «Актер және Азамат», «Шеберлік мектебі» жинақтарының шығуы­на мұ­рын­дық болған профессор Ахмет Мұсаның да «Атамұра» баспа­сы­нан шыққан екі кітабы таныс­ты­рылды. Баспа директоры Рақым­ғали Құл-Мұхаммед «Қа­зақ-қыр­ғыз жырларындағы бірлестік» және «Негізгі мақсат – мемлекеттік тілді меңгеру» деп аталатын бұл кітаптарды жоғары бағалады. Академиктер Сейіт Қас­қа­басов, Өмірзақ Айтбайұлы, жа­зу­шы Ахат Жақсыбаев, Мәриям Серәліқызы, Серағаңның немересі, Біріккен Араб Әмірліктерін­дегі Қазақстан елшісі Асқар Мусинов және бас­қалар ұлы актер­дің өнегелі өмірі жайын­да естелік ай­тып, көптеген ғибрат­ты жай­ларды алға тартты, көзайым альбом-кітап хақында оң пікірлерін білдірді. Ал, «Киізкітап» баспа­сы­ның директоры, көркем жоба авторы Шәйзада Байкенова «Шеберлік шыңы» альбом-кі­табы­ның Мәскеуде өткен ха­лықаралық конкурста «Мә­де­ниет, білім және ғы­лым» ата­лымы бойынша лауреат бол­ып үлгерген қуанышты хаба­рын сү­йіншілеп жеткізді. Қорғанбек АМАНЖОЛ.
Соңғы жаңалықтар

Ұлы Жамбыл мұрасы ұлықталды

Руханият • Бүгін, 00:33

Ұқсас жаңалықтар