Осыдан үш жыл бұрын Астанаға ауысып, одан кейін Алматыға қайта оралған халықаралық «Еуразия» кинофестивалі биыл жетінші рет 19-24 қыркүйек аралығында өтпек. Бұл фестивальға ұсынылатын фильмдер қазақ кинематографиясының соңғы жетістіктерін бейнелемек. Елімізде тек биылғы жылы 27 фильм түсірілген болса, оның 12-сі осы байқауға жолдама алады деп күтілуде.
Екі айдан кейін өткізілетін кино-думанның жай-жапсарына орай «Интерфакс-Қазақстан» агенттігінде «Еуразия» ХКФ-нің ұйымдастыру комитеті арнайы баспасөз мәслихатын өткізді. Өйткені, әне-міне дегенше келіп қалатын қыркүйек айы да алыс емес. Оған қоса кинофестивальге дайындық жұмыстары бүгінде қызу жүріп жатқан көрінеді. Бұл туралы БАҚ өкілдеріне «Еуразия» ХКФ ұйымдастыру комитетінің төрағасы, Ш.Айманов атындағы «Қазақфильм» киностудиясы» АҚ президенті Ермек Аманшаев айтты.
– 19 қыркүйек күні Мәдениет министрлігі, Ш.Айманов атындағы «Қазақфильм» АҚ, Кинематографистер одағы және «Еуразия» ХКФ дирекциясының ұйымдастыруымен болатын кинофестивальдің ашылу салтанаты өтеді. Шара жылдағыдай – «Almaty towers» кешенінде болады. Фестиваль шеңберінде жүретін барлық іс-шаралар мен кездесулер сол ғимарат пен ондағы бес кинозалда өтеді. Қазір негізгі ұйымдастыру жұмыстары аяқталды. Бағдарлама ауқымды болмақ. Шілде айының соңында фестиваль байқауына қатысатын негізгі картиналар белгілі болады. Конкурсқа 12 картина қатысады, – деді ол.
Және «Еуразия-2011» кинофестивалінің халықаралық қазылар алқасын атақты оңтүстіккореялық режиссер Ким Кидук басқаратыны белгілі болып отыр. Оның «Ариранг» атты соңғы картинасы «Ерекше оқиға» бағдарламасы бойынша көрсетілмек.
– Қазылар алқасының құрамына сондай-ақ, әйгілі жапон режиссерлерінің бірі Йоичи Сай (2007 жылы оның «Қан мен сүйек» фильмі «Еуразия» конкурсына қатысқан), Ресей халық әртісі, режиссер Владимир Хотиненко және әйгілі француз актері, режиссер және сазгер Жиль Маршан бар, – деді ұлттық студия басшысы.
Оның айтуынша, кинофестиваль барысында халықаралық конкурспен қатар, «Қарқынды дамып келе жатқан қазақ киносы – 2010 жылдың соңы мен 2011 жылы түсірілген фильмдер», «Халықаралық кинофестивальдердің жүлдегер фильмдері», «Виртуалды Батыс», «Өзгермелі Шығыс», «АҚШ елшілігі ұсынған деректі фильмдер бағдарламасы», «Венециялық кинофестиваль жаңғырығы» бағдарламалары ұсынылатын болады.
Еуразия кино кеңістігінде құлашын жайып келе жатқан кино-байқаудың бұлжымайтын бір дәстүрі – әлемге аты мәшһүр кино саңлақтарымен көзбе көз қауыштыруы. Биылғы жылы да «Еуразия» кинофестиваліне әлемдік кино жұлдыздары келеді. Осы фестивальдің негізгі қонақтарының арасында «Оскар» сыйлығының жүлдегері, француз актрисасы Жюльет Бинош, американдық актер, продюсер әрі сценарист, «Шанхайдағы талтүс», «Шақырылмаған қонақтар», «Ол, мен және оның достары» фильмдерінің кейіпкері Оуэн Уилсон да бар.
Бір айта кететін жәйт, өткен жылы «Еуразияның» конкурстық бағдарламасына ұсынылған 15-ке тарта отандық фильмдер ішінен іріктелген А.Сатаевтың«Адасқандар» мен Ф.Шәріповтің «Қызғылт қоян туралы аңыз» фильмдері қатысып, киногерлер тарапынан лайықты бағаланған болатын. Ал биыл экранға жолдама алған фильмдер ішінен Р.Әбдірашевтің «Балалық шағымның аспаны», Е.Кончаловскийдің экшн-фильм заңдары бойынша түсірілген «А-ға қайта оралу», А.Сатаевтың «Ликвидатор», С.Тәуекеловтің «Жерұйық», Е.Нұрмұхамбетовтің «Аңшы бала» және Д.Саламаттың «Кішкентай» фильмдерін ерекше атап өтуге болады. Ал, Г.Насыровтың «Гәкку», Ж.Пошановтың «Жел қызы» және Т.Байтүкенов пен Т.Қасымжановтың «Супербаха» фильмдері айрықша кинематографиялық әдістерімен ерекшеленеді. Бұл орайда, аталмыш фильмдердің халықаралық байқауға қатысуы мүмкіндігі сөз болды.
Айнаш ЕСАЛИ, Алматы.