«Құлансаз» ансамблі

Тәуелсіз мемлекеттер достас­ты­ғына жататын елдер де биыл мерейлі жыл табалдырығында тұр. Осы орайда Мәскеуде «Дос­тас­тық­тың жа­ңа көк­жиегі» атты көрме ашы­лып, онда тәуелсіз мем­ле­кет­тер өз­дері­нің осы жиыр­ма жылда­ғы эко­номикалық және өн­дірістік жетістіктерін паш етіп­ті. Мәдени шара ая­сында достастық елдер мәдениеті мен ұлттық дәс­түр фестивалі де жал­ғасын тап­қан. Көрме-фес­тиваль­ге елімізден төрт облы­с­тың өкілдері мен өнерпаздары қа­тысса, ша­­раға Ал­­маты облысы деле­гациясы да концерттік бағдарла­ма­сын ұсы­нып, мәс­кеулік көрермен көңі­лі­нен шыққан. Облыстық «Құлансаз» фольк­лор­лық-этнографиялық ән-би ансамблінің өнері мен жалпы сапары жайында облыстық Сүйінбай атын­дағы филармония директоры Ержан Қосбар­мақов былай деді. – Мәскеу – Еуропа мен Азия өр­ке­ниеттерінің тоғысқан жері. Халық шығармашылығы жетіс­тік­­терінің көр­месіне ТМД-ға мү­ше елдер қатысты. Көрмеде жа­ңа комбайндар, заманауи ұшақ­тар және басқа да түрлі техника көр­ме­нің көр­кін аша түсті. Әр мемлекет өзі­нің ең таңдаулы жетістіктерін алып келгені бірден бай­қа­лады. Мақ­сат тауар сапа­сын көр­сетіп, көрші­лер­­мен сау­да-саттық байланысты ны­ғайту болса, бұл өз шешімін тап­қа­нын айта кеткен орынды. Еларалық көрмеге келгендер жар­намалық стендтерін көр­сет­т­і. Екі мыңнан астам ғалым, кәсіп­кер­лер мен саясаткерлер бірлесіп, ғы­лым­да, машина жасау, атом энер­гетикасы, мұнай газ және медицина салаларын дамытудағы қол жеткізілген жетістіктерін әңгіме­леріне ар­қау етті. Ал, Қазақстан та­рапынан бұл шараға 30-дан астам компания қатысқаны елімізде ин­дустрия­лан­дырудың кеңінен құлаш жайғанын дәлелдеді. Әрине, ТМД-ның 20 жылдығы­ның тарихи маңызы ерекше. Сон­дық­тан бұл көрмеде Қазақстан өзі­нің бар­лық жетістіктерін толықтай көр­сет­­ті. Осы уақыт аралығында Қа­зақ­станның зор жетістікке жеткені өзге­лерді тіпті таңғалдырады. Қазір ішкі жалпы өнім бойынша еліміз Ресейден кейін екінші орында тұр. Бұл табысы­мызды бүкіл әлем мойын­да­ды, деген ол Қазақстан сауда өкі­леттілігінің Ресейдегі өкілі Вячеслав Черновтың жеке пікірін де жеткізді. Фестивальге ТМД елдерінің ең таң­даулы өнер ұжымдары келсе, Қа­зақ­станнан «Құлансаз» ан­самблі­нің өнерпаздары мәскеулік­терді өнерімен тәнті еткенін мақ­танышпен айтуға болады. Көрмеде экономикалық жетістіктер мен шығармашылық фестиваль достық пен бірліктің алтын кө­пірі болды. Ал, халық шығарма­шылығы жетістіктері көрмесінің ғимараты ха­лықаралық байланыс­тар мен мәдени қа­тынастар орталы­ғына айналды, деді бізбен әңгіме­сін­де өнер ұжы­мы­ның басшысы ерекше ықыласпен. Күмісжан БАЙЖАН, Алматы облысы.