Кеше Астанада Сыртқы істер министрі Ержан Қазыханов елімізге қысқа мерзімді сапармен келген БҰҰ Бас хатшысының арнайы өкілі, БҰҰ аймақтық орталығының басшысы, елші Мирослав Енчамен кездесті.
Кездесуде Қазақстан Республикасы мен БҰҰ ынтымақтастығының тиімді жақтары талқыланды. Сонымен бірге Орталық Азия өңіріндегі қазіргі жағдай, ұйымдасқан трансшекаралық қылмысқа, терроризм мен экстремизмге қарсы шараларды, есірткі таратуға қарсы іс-қимылдарды жетілдіру, су-энергетикалық проблемаларды шешу сияқты мәселелер қаралды .
Одан кейін тараптар ШЫҰ Саммитінің Орталық Азия өңіріне қатысты шешімдерін іске асыру мәселесін шешу және Астананың ИЫҰ министрлер кеңесіндегі төрағалығының басымдықтарын жүзеге асыру мәселесіне тоқталып өтті. Осы жерде БҰҰ Бас хатшысының арнайы өкілі М.Енча еліміздің халықаралық саяси сахнадағы белсенді қызметіне жоғары баға беріп, Қазақстанның Ауғанстан мен Қырғызстандағы саяси оқиғалардың ортасынан табылып, жағдайды тұрақтандыруда атқарып жатқан жұмысы қай елге болсын үлгі алуға тұрарлық істер екенін атап өтті.
Сонымен бірге, ол Елбасы Нұрсұлтан Назарбаевтың ядролық қару-жарақты қолдану саясатына қарсы ұстанған саясатын бүкіл әлемнің қолдауына ие болып отырғанын, осыған орай Қазақстан басшысы биыл Нью-Йорк қаласында ядролық қаруға қарсы өтетін әлемдік саммитке тағы да шақырылатынын айтты.
Дастан КЕНЖАЛИН.