Жеңістен кейін жеңіс

Астанада жасөспірімдер арасындағы әлем чемпиона­ты­ның жалауы желбіреді. Сенбі күні «Қазақстан» спорт са­райында жарыстың ашылу сал­танаты өтіп, әлемнің 48 елі­нен келген бозбала боксшы­лар алғаш­қы жекпе-жектерін бастап кетті. Қазақстан құрамасы алғашқы екі күнде төрт рет жеңіске жетті. Осы күндері алып сарайдың ішінде керілген шаршы алаңға төрт боксшымыз шығып, төртеуі де қарсыластарын тізе бүктірді. Бұл сында бірінші болып 57 кило салмақтағы Ерболат Ермеков қолғап түйістірді. Ол тәжік Шавкат Рахимовты айқын басымдық­пен ұтты. Одан кейін келесі күні Ерболаттың жолын әрі қарай Олжас Қалаубек (46 кг.), Аян Қалибеков (60 кг.), Бекжан Кібіт­қалиев (54 кг.) жалғас­тыр­ды. Олжас жапон Юкий Накаджимана, Аян беларусь Артем Ляп­ко­ны, ал Бекжан сириялық Алшава Абдулвахабды оңай жеңді. Шүкір, қазір біздің балалар­дың аяқ алысы жаман емес. Құ­ра­маның менеджері, Олимпиада чемпионы Ермахан Ыбы­ра­йымов­тың өзінің жарысқа дайындығына, жеңіске деген жігерлігіне риза екенін чемпионат кезінде бірнеше рет байқап қал­дық. Чемпио­нат­тың ашылу сал­танатынан кейін атақ­ты боксшы­ны жарыс туралы әңгімеге тар­тып көрген­біз. Сонда Ермахан Ыбырайымов осы әлемдік бәсе­кеде балалары­мыздың бірнеше алтын жүлдені алып беретініне сендірген. Дегенмен, бізбен иық теңестіріп бәсекелесетін коман­да­лардың да бар екенін жасыр­ма­ған. Чемпио­наттың алғашқы айқастарына қарап отырсақ, шы­нымен де Куба болмаса да бірнеше елдің алтын жүлдені көптеп жұлып алатындарын байқатқа­нын көру­ге болады. Мысалы, ала тақиялы ағайындардың өзі Астанадан бос қайтпайтындарын кешегі айқас­тарда көрсетіп берді. Сол сияқты Ресей, Украина, Әзербайжан бокс­­шылары да бас жүлдеге дә­мелі екендерін бай­қатып отыр. Қазір чемпионаттың үш кү­нін­де тосын оқиғалар болмаса да, боксшылардың жекпе-жектері қы­зық­ты және тартысты өту­де. Мы­салы, сенбі күні Әзер­бай­жан мен Армения боксшылары өзара кездесіп, шаршы алаңның шаңын біраз қақты. Осы күнгі екі көршілес елдің арасындағы жекпе-жек жан­күйерлер ең қы­зыға тамашалаған айқас бол­ғаны сөзсіз. Бұл екеуінің кездесуі 48 кило салмақ дәреже­сін­де өтті. Армения жағынан шар­шы алаңға Эрик Петросян, ал Әзербайжан құрамасынан Масуд Юсифзаде қолғап түйістірді. Осы сында Кавказ елдерінің жанкүйер­лері туларын жалаулатып, өз ана тілдерінде бір-бірімен айтысып, тартысқанына да куә болдық. Бі­рақ жанкүйерлер сол кездесуде өздерін ұстап, қызуқанды мінездерін көрсеткенімен, жарыс қожа­йын­дарына құрмет ретінде сөз таластырудан арыға бармай, тарап кетті. Ал кездесудің өзі Армения боксшысының пайдасына шешілді. Армяндардың Эрик Петросян деген баласы жекпе-жекте сауатты қорғана жүріп, қарсы­ласына дәл соққылар дарытып, ұпай саны бо­йынша жеңісті жұлып әкетті. Енді келесі кезеңде қос елдің бокс­шы­ла­ры та­ғы да кездесіп жатса, әзер­бай­жан­дар кешегі жіберген есені қайта­ру­ға тырысатыны сөзсіз. Бұл сынға Әзербайжан 17 баласын қа­тыс­ты­рып отыр. Ал Армения біз­дің ел сияқты 13 боксшысын әкелді. Қазір жүлделі орындарды адам­ның саны емес, сапасымен же­ңіп алуға болатынын барлық жарыстардан көріп жүрміз. Бұл жағдайды өткен әлем чем­пио­нат­тары да көрсетіп берген. Мыса­лы, 2009 жылы Ереванда жасөс­пірім­дер арасындағы әлем­дік бәсе­ке ал­ғаш рет Халықара­лық бокс қауым­дастығының аясында өткізілгенде 47 елден келген 283 боксшының ішінде Еуропа, Азия құрамалары­ның жүлдеге әбден лайық бала­ларын көптеп кездестірген едік. Соның ішінде Армения өз ала­ңын­да тұңғыш рет жалпы коман­далық есепте қола жүлдеге ие болға­нын білеміз. Ал бас жүлдені Ресей, күміс жүлде­ні Куба бокс­шылары қанжыға­сына байлап кеткен болатын. Сол сында біз­дің боксшылар тоғы­зын­шы орын алып, жүлдесіз қайтқаны есімізде. Жалпы, Қазақстан құрамасы әлем чемпионаты өткізіле баста­ған 2001 жылдан бері 8 алтын, 8 күміс және 18 қола жүлде жинап үлгер­генін айту керек. Біз жүл­делер саны бойынша Ресей мен Украинадан кейін үшінші орын­да келеміз. Дастан КЕНЖАЛИН.