Елорда қақпасының кескіндемесі

Өткен сенбі күні Мемлекет басшысы Нұрсұлтан Назарбаев «Астананың Бас жобасы ғылыми-зерттеу жобалау институты» МКК-да болды. Қазақстанның азаттығын ай­ғақтайтын ел Тәуелсіздігінің 20 жылдық мерейтойына орай, Қа­зақ­станның елордасы – Астана қаласында салтанатты қақпа бой көтермек. Бұл қақпа 20 жылдық белесті бағындырған еліміздің да­му тарихы мен гүлденуінің сим­волы іспетті десек, артық айт­қан­дық болмас. Астана қаласының әкімі Иманғали Тасмағамбетов 20 жылдың бедерінде тұрған мем­лекетіміздің айтулы мерей­то­йы қарсаңында Мемлекет бас­шы­сының назарына осы салтанатты қақпаның кескіндемелік жоба­ларын ұсынды. Сонымен қатар, Президентке қала құрылысы жо­баларының жүзеге асырылу ба­рысы жайында баяндап берді. Бір атап өтерлігі, бүгінде Астана құрылысы өзінің шешуші кезеңіне қадам басты. Қазақ­стан­ның символына айналып үлгер­ген бас қала өзінің рухани орта­лық ретіндегі орнын да мықтап айқындады. Сол себепті де Мемлекет басшысының назарына ұс­ынылған, болашақта әсем шаһар төріндегі ғимараттардың қата­ры­нан сап түзейтін бірегей нысан­дар­дың барлығын дерлік сәулет өнерінің бүгінгі заманға сай таң­даулы үлгілері мен соны шешімдері деп сенімді түрде баға беруге болады. Яғни, олардың кез кел­гені бас қаланың бай архи­тектуралық ансамблін толық­ты­ра түспек. Ал бұл өз кезегінде Астана көркінің күн өткен сайын айшықтала, әдемілене, сәндене түсуіне үлес қосатын болады. Салтанатты қақпа Президент Нұрсұлтан Назарбаевтың идея­сы­нан туған құнды жоба. Демек, ол қаланың кезекті бір нысан­дары қатарынан орын алып қана қоймайды, Салтанатты қақпа – 20 жылдық мерзім ішінде беделді әрі тұрақты мемлекет ретінде әлемдік саясат сахнасынан орын алған жас елдің эмблемасына да айналмақ. Осы орайда, бұл ны­санда ұлттық нақыш үлгілері көрініс тауып, ол жаңа заманауи архитектуралық шешімдермен ше­­бер шендестірілуі тиіс, деді Мемлекет басшысы. Бұдан кейінгі кезекте Нұр­сұл­тан Назарбаев құрылысы жүріп жатқан «Астана Медиа Орталық» телерадио кешенін аралап көрді. Президентке бұл нысанның жо­ба­сын еліміздің Байланыс және ақпарат министрі Асқар Жұма­ға­лиев таныстырды. Аталған ке­шен­нің жалпы ауданы 75,5 мың шаршы метрді құрайды. Минис­тр­дің айтуынша, ауқымды аумақ­ты алып жатқан кешен құра­мын­да аппаратты-студиялық блоктар, көп арналы телехабарлар тарату блогы, көп арналы радиохабарлар тарату блогы, 100 орындық ки­ноконцерт залы, ұлттық медиа­мұ­рағаттың аппа­рат­тық кешені бар. Мұндай орта­лық­тың негізін қалаудағы басты мақсат – мемлекеттік телеарна­лар­дың техника­лық базасын қа­зіргі заман тала­бы­на сай келетін стандарттарға сай келтіру, ме­ди­а­кеңістікті ұлт­тық медиаконтентпен толтыру, эфирлік сандық теледидар мен радиотарату жү­йесіне өту, элек­трон­ды медиамұ­ра­ғатты құру бо­лып табылады. Яғни, «Астана Медиа Орта­лық» – әмбебап кешен. Оның ерекшелігі – бұл жерге еліміздің барлық мемлекеттік электронды бұқаралық ақпарат құралдары шо­ғырланбақ. Ал олардың бар­лығы озық технологиялық ресурстармен біріктірілмек. Маман­дар­дың сөзіне қарағанда, қазіргі заманның қайталанбас техно­ло­гия­лық шешімдеріне сүйене оты­рып, бой көтеретін мұндай ме­диа­­алаңның бұрынғы посткеңес­тік кеңістік шеңберінде ешқандай баламасы жоқ. Ләйла ЕДІЛҚЫЗЫ. Суретті түсіргендер С.БОНДАРЕНКО, Б.ОТАРБАЕВ.