Мереке қарсаңындағы мерейлі істер

Соңғы жылдары ерке Ертіс жағасындағы ежелгі Семейдің көркі кіріп келеді. Қаланы көг­ал­дандырып, жарықтандыру ісінде біршама ілгерілеушілік бай­қалады. Әсіресе, биылғы мерекелі жылы қала өмірінде өзгеріс, жаңалықтар баршылық. Айта­лық, бұрын ой-шұңқыры көп ор­талық базардың маңы ретке келіп қалды. Енді орталық алаңға күрделі жөн­деу жұмыстары жүргізілуде. Ондағы төселгеніне қырық жыл­дан асқан, әб­ден ескіріп, тозған бетон, субұрқақ, ертеректе осы жерде тұрған «күн көсемнің» алып ескерткішінің тұғыры алы­нып тасталды. Абай театрын кө­легейлеп тұрған шыршалардың біраз бөлігі алынбақ. Соның бә­рінің есебінен алаң аумағы біршама кеңейтіледі. Мұнда жаңа­дан төселетін айшықты плиталар, гүpзарлар, көз тартатын жаңа субұрқақ алаңның өңін ашып, сәнін келтірмек. Биылғы жылы ел Тәуел­сіз­ді­гімен бірге, Елбасының алғашқы Жарлық­тары­ның бірі – Семей атом поли­го­ны­ның жабылғаны­на да 20 жыл толуы кеңінен аталып өтіледі. Қазан айының ортасында Ертіс айрығындағы аралда полигон құрбанда­ры­на арнап орна­тылған монумент басында Елбасының қатысуы­мен алқалы жиын өтеді деп кү­тілуде. Соған орай мұнда да игілікті шаралар атқарылуда. Бар­лығына респуб­ликалық бюджеттен 244 миллион теңге қаражат бөлінетін болады. Қала көркін ажарлап қана қоймай, оның абы­ройын асқақтататын мұндай игі шараны қа­лайша құптамассың! Қайсыбір аудан­дар­дың да қала­ны көркейтуге атсалы­сып отыр­ғаны көңіл сүйсінтеді. Қаланың ұлылар еліне шыға берісінде де бір игі шаруа қолға алынуда. Яғни, қала мен әуежай бұрылысында ұлыларға қатысты әсем панно орна­тыл­мақ. Және бір айта кететін жайт,  елімізді дамытудың 2020 жылдарға дейінгі бағдарламасы бойынша жа­ңадан салы­натын бір қабатты 50 үй құры­лысы да қаланың осы тұсынан бой көтереді. Оған негізінен ауылдан келгендер қоныс­танатын болады. Үкімет тарапы­нан осы мақсатқа  233 миллион теңге қаржы бөлініп отыр. Жаңа тұр­ғын үй алабын су, жарықпен қамта­м­а­сыз ету, балалардың ой­ын алаңдарын салып беруді де Үкімет өз мойнына алмақ. Бұл ел Тәуелсіздігі мерекесі қар­саңындағы мерейлі істердің бір парасы ғана. Ал оның жа­ра­сымды жалғасын та­батынды­ғы­на еш күмән жоқ. Дәулет СЕЙСЕНҰЛЫ, Семей.