Бірлескен қадамдар оң бағаланды

Кеше Сыртқы істер министрі Ержан Қазыханов АҚШ-тың Ауғанстан және Пәкстан жөніндегі жаңадан тағайындалған арнайы өкілі Марк Гроссманмен кездесті. Кездесуде екі ел арасындағы ынтымақтастықты тереңдетудің орындалу барысы әңгіме болды. Сондай-ақ тараптар өңірлік қау­­іп­­сіздік пен Ауғанстандағы жағ­дайды тұрақтандырудағы бірлесе әрекет етудің жайына назар ау­дарды. Бұл мәселеде Қазақ­стан­ның үлесі зор. Мұндай қадамдар АҚШ тарапынан оң бағаланады және бірлесе әрекет ету  өте ма­ңыз­ды іс болып табылады. Осы­ған байланысты Гроссман Сырт­қы істер министрі Е.Қазыхановқа өзі­нің алғысын жеткізді. Со­ны­мен қа­тар, кездесуде алдағы айларда өтетін кездесулер ба­ры­сы да сөз болды. Оның ішінде БҰҰ Бас Ассам­блея­сында және Ыс­там­бұл­да қараша айында өтетін іс-шаралар шеңбе­рін­дегі кездесулер бар. Оған Ау­ған­станның ең жақын көрші­ле­рі­мен бірге, АҚШ пен Қа­зақстан да қатысады. Сол кездесулерде тер­рор­шылдықпен күрес жә­не Ау­ған­станды тұрақ­тан­дыру мә­селелері жан-жақты тал­қыланбақшы. Кездесуден кейін америкалық дипломат бұқаралық ақпарат құ­ралдары өкілдерімен брифинг өт­кіз­ді. Басты сұрақ жақында АҚШ-та жарияланған террор­шыл­дыққа бейім елдердің тізімінде Қазақ­стан­ның да болуына қатысты қой­ылды. Ол осы мәселеге түсінік берген АҚШ елшілігінің мәлім­де­месін қолдайтындығын білдіре келіп, Қазақстан мен АҚШ террор­шылдықпен күрес жүргізіп келе жатқан елдер екендігін ерекше атап өтті. Сондықтан да Қазақ­стан террор қаупі туатын елдер санатына жатпайды. Ал АҚШ-та жасалған тізімнің нақты елдерге емес,  жекелеген азамат­тарға қа­тыс­ты тізілуі мүмкін, деді Гроссман. Ең бастысы, Вашингтон елі­міздің тер­роршылдықпен күресті қол­дау­ын бағалайды және ма­ңызды деп есептейді. Асқар ТҰРАПБАЙҰЛЫ.