Арнайы пойыз Арқалыққа келді

Тәуелсіздіктің 20 жылдығына орай Астанадан шыққан «Менің Қазақстаным» арнайы пойызын кеше Арқалық вокзалында қала жұршылығы салтанатты жағдай­да күтіп алды. Арқалыққа атба­сын бұрған халықты құттықтаған қала әкімі Теміржан Төлеубаев ел егемендігінің 20 жылдығымен тұс­па-тұс келген шаһардың 55 жылдық мерейтойының қарса­ңын­дағы «Нұр Отан» ХДП мұ­рындық болған игі бастамаға ризашылы­ғын білдірді. Құрамында есімі елге белгілі әнші-сазгерлер – Ал­тынбек Қоразбаев, Нұрғали Нү­сіп­жанов, Сембек Жұмағалиев және әйгілі «Гүлдер» ансамблі, Олимпиада чемпионы Ермахан Ыбырайымов секілді спорт саң­лақ­тары бар делегацияны жергілікті жұртшылық асқан қонақ­жайлылықпен қарсы алды. Арнайы шарадан соң «Менің Қазақстаным» арнайы пойызы­ның «жолаушылары» өз жұмыс­тарын бастап кетті. Вокзал ғима­ра­тында әуелі Денсаулық сақтау министрлігінің өкілі Ернар Мыр­за­құлов тұрғындармен жолығып, олардың талап-тілектері мен ден­саулығына қатысты өзге де сұрақ­тарына жауаптар берді. Арқалық қаласына қарайтын ауылдық округтерден де кеңес алуға келген халық қарасы мол болды. Мұнан кейін «Нұр Отан» ХДП-ның қалалық филиалын­да­ғы қабылдаулар да қарапайым ха­лықтың мұң-мұқтаждары мен талап-тілектеріне арналды. Мұнда­ғы халықтың санында да есеп болмады. Түрлі мәселелермен кезек күткен жұртшылыққа партия­ның орталық аппаратынан келген өкілдер өздерінің тұшымды кеңес­терін беріп отырды. Тәуелсіздіктің 20 жылдық мерейтойына дейін Арқалықта атқарылған және атқарылуға тиіс жұмыстар көңіл қуантады. Мә­селен, соңғы бес жылда бес тұрғын үй кешені пайдалануға берілсе, жуырда мерзімінен бұрын жаңа тоғыз қабатты, елу төрт пәтерлі тұрғын үй өз иелерін таппақшы. Олардың ішінде бұ­рын­ғы пәтер кезегінде тұрғандар мен жас мамандар бар екен. Кешкісін қала халқы орталық «Наурыз» алаңында «Менің Қа­зақ­станым» арнайы пойызымен жол­ға шыққан еліміздің эстрада жұлдыздарының концерттік бағ­дар­ламасын тамашалап, ерекше көңіл күймен тарасты. Әбдірахман ҚЫДЫРБЕК, Суретті түсірген  Виталий САЯПИН.