Бұл қазақта жігіттер бар марқасқа

Ақжайық өңірінде спорттың дамуы­на қолдау көрсетіп, жанашырлық таны­тып жүрген кәсіпкерлердің қатарында кімдер бар дегенде Жарқын Тәжіға­лиев­тің есімі ауызға бірінші оралады. Негізгі мамандығы құрылыс инженері бола тұра, оның туабітті жаратылысы мен бітім-болмысы спортпен біте қайнасып келеді. Жас кезінен өзі де спортпен айналысқан Жарқын Серік­ұлы­ның қазақ күресінен түйе балуан – республика чемпионы атанған кезі де болған. Біз оған жолыққан күні бойы мен сойы бірдей келіскен, нар тұлғалы аза­мат­тың жүзі жарқын да жайдары көрінді. Оның бет әлпетінде әлдебір қуаныш пен жақ­сы­лықтың нышаны айқын аңғары­лып тұрды. Мұның сыры да көп кешікпей белгілі болды. Ж.Тәжіғалиевтің қол­дау көр­сетуі­мен өңірден жасақталған жас дойбы­шылар командасы бұдан бірнеше күн бұрын Бал­тық бойындағы Эс­то­нияға, әлем чем­пио­натына қатысу үшін аттанып кеткен екен. Сол жақтан Жайыққа қуанышты хабар жетіпті. Команда мүшелерінің бірі Алтынай Жұма­гел­диева әлем чемпионы атаныпты. Міне, өз аты бәйгеден озып келгеннен бетер қуануының сыры осында екен. Бұдан басқа Жарқын Серікұлы Жа­йық өңірінде бірнеше әлем чемпио­ны­ның шығуына себепкер, дәнекер бола біліпті. Олардың дені – ауыл жастары. Со­лар­дың арасында грек-рим күресі­нен әлем чем­пионы Артур Үмбет­қалиев те бар. Ж.Тәжіғалиев өзінің негізгі маман­дығына сай құрылыс фирма­ларын­д­а жетекшілік қызмет жасай жүріп, содан түскен пайданың белгілі бір бөлігін ауылдағы спорт деңгейін көте­руге жұмсап келеді. Оның кәсіпкерлік қызметінің екінші бір тармағы халыққа қызмет көрсету саласына – қоғамдық тамақтандыру жүйесін жетілдіруге ба­ғыт­талған. Бұдан түскен табыстың әжеп­тәуір бөлігі тағы да спорттың көкжиегін көтеруге кетеді. «Облыстың шалғай аудандарында Жарқын Серік­ұлының қолдауымен шахмат, ат бәйге­сі, күрес, жаяу жарыс секілді спорт түрлерінен ұйымдастырылған жарыс­тар ауыл жастарының арасында сала­матты өмір салтын қалыптасты­ру­ға елеулі септігін тигізді», дейді Батыс Қазақстан облыс­тық дене шынықтыру және спорт басқар­масының бастығы Мү­сілім Оңдағанов. Есімі Ақжайық өңіріне кеңінен танымал кәсіпкер Жарқын Серікұлы­ның спортқа деген жанашырлығының тағы бір ерекше көрінісін айтпай кету әбестік болар еді. Ол таяу және алыс шетелдерге әртүрлі спорт сайыс­тары­на баратын жастар мен спортшыларды материалдық тұрғыдан қолдап қана қоймай, жанашыр әрі жанкүйер ретінде олармен бірге өзі де еріп жүретіндігі. Әрі чемпионаттар қанша күнге созыл­са, сонша күн бола­тындығы. Айталық, былтыр Қостанай қаласында Азия чем­пионаты өткен кезде ол коман­да­дағы он екі баламен бірге он күн сол жақта жүріпті. Әйтеуір, бұл еңбегі еш кетпеген. Облыстан барған төрт спортшы Азия чемпионы атанып қайтыпты. Темір ҚҰСАЙЫН, Орал.