Аспандағы айшықтар

Жексенбі күні елорданың «Жоламан» аэродро­мында Көлік және коммуникация ми­нистрлігінің «Мемлекеттік авиациялық орта­лық» РМК-ның 5 жылдығына арналған мерекелік авиашоу өтті. Авиаторлар мерекесіне тұңғыш ғарышкер Тоқтар Әубәкіров, Азамат­тық авиация комитетінің төрағасы Рәділбек Әдимолда арнайы қатысты. Аталмыш орталық Қазақстан Респуб­лика­сының азаматтық авиациясы мен әуе қорғанысы күштеріне мамандарды әзірлеумен шұғыл­да­натын ұйымдар үшін ұшқыштарды ал­ғаш­қы дайын­дық­тан өт­­­кізудің база­сын қа­лып­­тас­тыру мақ­са­тын­да құрылған еді. 5 жыл ішінде дәрі­гер­лік-ұш­қыштық сарап­та­ма­лық ко­миссияның қоры­тын­дысы бойын­ша ден­саулығы жағы­нан ұшуға жарамды деп танылған 16-18 жас аралығындағы 275 курсант оқып шық­қан. Олардың ішін­де 55-і әуесқой-ұш­қыш болса, 50 курсант авиациялық техник-механик мамандығына бейімделген. Мұнда білім беру тегін болғандықтан қызығушылық танытып келген жастардың саны да жыл сайын өсіп келеді. Курсанттардың авиашоу бағдарламасы ая­сын­да парашютшілер мен планердің ұшу өнері, қону дәлдігіне және қону сапасына курсант-ұш­қыштар, нұсқаушы-ұшқыштар арасында іріктеу жарыстары өткізілді. Сонымен қатар, 14-18 жас­тағы курсанттар арасында өткізілген авиацияны дамыту тарихы бойынша сұрақ-жауап сайысы да өте қызықты болды. Жеңімпаздарға ұшақтарда ұшуға мүмкіндік берілді. Орталықтың оқытушылық, ұшқыштық және инженерлік-техникалық құрамы негізінен офицерлерден тұрады. Офицерлердің нұсқаушылық және оқытушылық жұмыстарындағы кәсібилік­тері жоғары. Орталық басшыларының пікірлеріне қара­ғанда, бұл жерде оқу үрдісі екі кезеңнен тұрады – теориялық курс және ұшқыштық пен өн­дірістік практика. Теориялық және практикалық оқу үшін орталықтың қажетті өндірістік базасы, оның ішінде, тренажерлік дайындық сыныбы бар оқыту курсы, «Жоламан» авиациялық алаңы бар. «Жоламан» ұшу-қону алаңы авиацияның аса жеңіл ұшақтарында оқу-жаттығу ұшуларын орындауға арналған. Авиашоу барысында курсанттар ұшақтармен ас­панда түрлі әуе қи­мыл­дарын жасап қа­на қой­май, парашютшілер мен Robinson R44 тік­ұшағын мең­герген­дер әуеден аса шеберлікпен секіріп жинал­ған қауымды тәнті етті. Жас курсант­тар­дың шеберліктерін көр­ген халқымыздан шыққан тұңғыш ға­рыш­кер, Ке­ңес Одағының Батыры, Ха­лық Қаһарманы Тоқтар Әубәкіров жастардың өте тамаша өнер көрсеткенін тілге тиек ете келе: «Мен көпті көрген адаммын. Жастардың мұндай таланттары шынымен де адамды жігерлендіреді. Маған өте ұнады. Мен осы жігіттерге рахмет айтқым келеді. Қарап отырсаң, сондай қиын темірді біздің кішкентай ғана ұл-қыздарымыз игеріп отыр ғой. Талабы мол жастарды көргенде елің үшін, Отаның үшін кәдімгідей қуанып қаласың. Еліміздің ертеңі осы жастар. Солардың қанат­тары қатайып өсе берсе екен деймін», деп жастарға өзінің ақ тілегін арнады. Мемлекеттік авиациялық орталықтың қыз­мет­кер­лері Қазақстанның қыз-жігіттерін ұшқыш­тар оқуы­на шақырады. Оқу тегін, тек мықты денсаулық қажет. Арай ҮЙРЕНІШБЕКҚЫЗЫ.