Жақсы дайындық жарыста көрінеді

Осы күндері Астанада хоккейден Қазақстан кубогы жолындағы жарыстар өтуде. Оған «Арыстан» (Теміртау), «Ал­маты» (Алматы), «Арлан» (Көк­шетау), «Барыс-2», «Астана» (екеуі де Астана), Бейбарыс» (Аты­рау), «Горняк» (Рудный), «Ертіс-Павлодар» (Павлодар), «Қаз­цинк-Торпедо-2» (Өскемен), «Са­ры­арқа» (Қарағанды) коман­да­лары қатысуда. Қазір командалар екі-екі кездесуден өткізіп үлгерді. Осы ойын­дардың нәтижесіне қарап, жарыс­қа барлық клубтардың жоғары дайындықпен келгендерін көруге болады. Мысалы, турнир­дің фавориті саналатын «Ба­рыс-2» мен «Қазцинк-Торпе­до-2», еліміздің был­тырғы чем­пионы «Бейбарыс» «Арыстан», «Арлан» команда­лары­нан ұты­лып қалды. Сөйтіп, екі ойынның біреуінде жеңілуге мәжбүр бол­ды. «Қазцинк-Тор­пе­до-2» «Астанадан» 5:0, «Арланнан» 6:1 есебімен жеңілсе, «Ба­рыс-2» «Арыс­таннан» 5:1, Бейба­рыс» «Барыс-2»-ден дәл осындай есеппен есе жіберді. Ұтылған командалар енді басқа қарсылас­тарын жеңбесе, кубок үшін та­ласулары өте қиынға түседі. Ал «Астана», «Сарыарқа», «Ертіс-Павлодар» сияқты клубтар керісінше, жарысты жақсы бастады. Биыл жаңадан құрылған «Астана» командасы өскемендік клубты 5:0 есебімен жеңсе, келесі ойында Рудныйдың «Горняк» ұжымын 4:1 есебімен ұтты. Әзірше «Горняк­тың» жолы болыңқырамай тұр. Олар екінші матчында да «Сары­арқадан» 5:3 есебімен жеңілді. Қа­ра­ғандылық команда болса, ал­ғашқы кездесуінде «Арланды» 2:0 есебімен жеңген болатын. Павло­дарлық клубтың қазір бабы мен бағы келісіп тұрғандай. Бірінші ойында олар «Алматыны» 4:3, екін­ші матчында «Арыстанды» 4:2 есебімен ұтты. Енді «Ертіс-Павлодар» «Барыс-2» коман­да­сымен ойынға дайындалуда. Осы ойындардан кейін «Астана» клубы 6 ұпаймен А тобының турнир кестесін бастап келеді. Екінші орынды «Сары­арқа», үшінші орынды «Арлан» иеленіп отыр. «Астана» коман­дасының бас бапкері Владимир Беляевтің айтуынша, биыл ку­бок­ты жеңіп алуға олар қолдан келген мүмкіндіктің бәрін жа­сайды. Кубогтың жеңімпазы 27 та­мыз күні анықталады. Осы күні «Қазақстан» спорт сара­йын­да финалдық ойын өтеді. Дастан КЕНЖАЛИН.