Бокс
«Астана Арланс» бокс клубы Бүкіләлемдік бокс сериясы (WSB) аясындағы ширек финалдық кездесулерін Қарағанды қаласындағы Серік Сәпиев атындағы Бокс орталығында өткізетін болды.
Әуелде бұл жекпе-жектер оңтүстік астанадағы «Алматы Арена» спорт сарайында өтеді деп жоспарланған еді.
Еске салар болсақ, «Арландардың» ширек финалдағы қарсыласы Ресейдің «Патриот Боксинг Тим» бокс клубы. Алғашқы кездесу бүгін Ресейдің Кемерово қаласында өтсе, қарымта жекпе-жектер 20 мамыр күні Қарағандыда ұйымдастырылады.
Теннис
Қазақстандық теннисші Зарина Дияс Әйелдер теннисі қауымдастығының (WTA) жаңартылған рейтингісінде 151-ші орынға көтерілді. Бұған дейін теннисші қызымыз 187-орында тұрған болатын.
Ал Қазақстанның бірінші ракеткасы Юлия Путинцева бір саты төмен сырғып, 32-ші орынға түсті.
Жалпы, әйелдер арасындағы теннисшілердің үздік үштігі өзгеріссіз қалды. Топты америкалық теннисші Серена Уильямс бастап келеді. Екінші орында неміс теннисшісі – Анжелик Кербер. Ал үштікті чехтің теннисші қызы Каролина Плишкова түйіндеп тұр.
Еркін күрес
Орынборда қыздар арасында еркін күрестен өткен халықаралық турнирге Ресей мен Қазақстаннан 205-ге тарта балуан қатысты.
Жарыстан еліміздің намысын қорғаған Маңғыстау облысының балғын балуандары олжалы оралды. Олар бір алтын, бір күміс және екі қола медаль алып, жанкүйерлерін қуанышқа бөледі.
Алтын жүлдені 38 килода өнер көрсеткен Марал Тәңірбергенова жеңіп алса, Әсем Қайбуллаева (43 кг) күміс медальды қанағат тұтты. Ал Алена Елесеева (32 кг) мен Сабина Қайбуллаева (38 кг) қола жүлдеге қол жеткізді.
Әзірлеген
Қайрат ЖҮНІСҰЛЫ
