Халықаралық Түркі академиясы тағайындаған Исмаил Гаспыралы атындағы халықаралық Медиа сыйлық бірқатар мемлекеттердің журналистеріне табысталды. Атап айтқанда, түркиялық «Yeniçağ» газетінің сарапшысы Күршад Зорлу, Әзербайжанның белгілі қаламгер-журналисі Аида Эйвазова, «ҚазАқпарат» халықаралық ақпарат агенттігінің бас директоры Асқар Омаров пен түркиялық NTV арнасының бағдарлама редакторы Ахмет Йешильтепе Медиа сыйлықтың алғашқы иегерлері атанды.
Сондай-ақ, басқосуда Түркі кеңесінің жоба жетекшісі Джейхун Шахвердиев, «TRT-Avaz» телеарнасының директоры Мұрат Аккоч, бас кеңсесі Брюссель қаласында орналасқан «EURELIZ» Медиа және стратегиялық коммуникациялар компаниясының директоры, журналист Эли Хаджиева, қырғызстандық «Kabar» Ұлттық ақпарат агенттігі директорының орынбасары Тынчтык Карымшаков, түркиялық «NTV» телеарнасының бағдарлама редакторы Ахмет Йешильтепенің қатысуымен екінші отырыс өтті. Онда түркітілдес мемлекеттер арасында ақпарат алмасудың тиімділігін арттыру мақсатында форумға келген бұқаралық ақпарат құралдарының өкілдері өзара тәжірибе алмасып, алдағы уақытта тығыз қарым-қатыныста жұмыс жасасу туралы келісімге келді.
