Жеңіс даңқы көмескіленбейді
Ақпарат және коммуникациялар министрі Дәурен Абаев қазіргі қазақстандық үшін 9 мамыр – Жеңіс күні аса қымбат мереке деп есептейді. Оның пікірінше, ел халқының 99 пайызы бұл күннің құнын жақсы біледі.
«Баршамыз бұл мейрамды жақсы көреміз және құрметтейміз – бастысы да осы. Қалғанының бәрі, менің ойымша, саясаттың шаруасы. Басты идеология мынада: біз бұл мерекені елеусіз қалдырмай, жыл сайын атап өтіп келеміз. Мемлекет басшысы жыл сайын «Мәңгілік алауға» гүл шоғын қойып, ардагерлерді құттықтайды», деді министр «Хабар» телеарнасындағы «Открытый диалог» жобасы шеңберінде сөйлеген сөзінде.
Сондай-ақ, Дәурен Абаев «Мәңгілік полк» шарасына қолдау білдірді. «Мәңгілік полк маршына қатысты менің жеке ұстанымым – оны қолдаймын, өйткені бұл – адамдардың өздерінің майданда қаза тапқан немесе Ұлы Отан соғысы кезінде әскери қызметте болған ата-бабаларына деген естелігі. Ең бастысы осы. Сондықтан, бұл қадамды біздің қолдағанымыз жөн», деді ведомство басшысы.
Қауіпсіздік – халық үшін қажет шара
10 мамырда Астанада «Құқық тәртібі» деп аталатын жедел-тәжірибелік шара басталған болатын. Ол 30 мамырға дейін жалғасады. Аталған шара аясында құжаттарды күшейтілген режімде тексеру жүргізіледі.
«Астанада тұратын азаматтар, заң бойынша, барлық ереже бойынша тұрақты тұратын жерінде тіркелуі тиіс немесе уақытша тіркеуде болуы керек. Бұл – қалыптасқан тәжірибе. Мені адамдардың осы мәселе алаңдататыны таңғалдырады. Астанада тұратын тәртіп бұзбайтын азаматтарға, осында үй-жайлары бар және жұмыс істейтін адамдарға алаңдауға еш негіз жоқ», деп сендірді министр.
Дәрен Абаевтың сөзіне қарағанда, ЭКСПО-2017 қарсаңында және ол өтетін кезеңде қауіпсіздікті күшейту – аса қажетті үдеріс. Өйткені, біздің азаматтарымыз бен көрме қонақтары аса ауқымды халықаралық шара уақытында деструктивті шабуылдарға ұшырамауға тиіс.
«Баршамыз ірі шаралар кезінде «қол жылытқысы» келетін элементтер де өздерінің жымысқы іс-әрекетін күшейтуге тырысатынын білеміз. Сондықтан, мемлекеттің бірінші кезекті міндеті – Қазақстан азаматтары мен шетелдіктердің қауіпсіздіктерін қамтамасыз ету», деді осы мәселеге орай айтқан сөзінде ведомство басшысы.
Интерактивті портал іске қосылады
«Қазақстандағы 100 жаңа есім» жобасы шеңберінде интерактивті портал іске қосылуы мүмкін.
«Мемлекет басшысының «Болашаққа бағдар: рухани жаңғыру» бағдарламалық мақаласы аясында жүргізіліп келе жатқан қоғамдық сананы жаңғырту бағытындағы жұмыстар уақыт өткен сайын күш ала түсіп отыр. Жобада көрсетілген мәселелердің әрқайсысы бойынша жұмыс топтары құрылған. Осыған байланысты күні ертең біз де жұмыс тобының алғашқы отырысын өткіземіз. Мұнда назар аударатын басты мәселе: біз тізімге енгізілетіндер Қазақстанның шын мәнінде жаңа тұлғалары болуы шарт деген ұйғарымға келдік. Бұл арада біз өзінің өмірінде қандай да бір табысқа жеткен адамдар туралы айтуға тиіспіз», деді министр.
Дәурен Абаев жоба аясында еліміздің белгісіз тұлғалары таныстырылуы тиіс деп санайды. «Мәселен, біз күнделікті жұмыс істейтін құтқарушыларды, кәсіпкерлерді, шоу-бизнес адамдарын, мұғалімдер мен оқытушыларды көрсетуіміз керек. Жай ғана көрсетіп қоймай, олардың өмірін, жеткен жетістіктерін жария етуіміз қажет. Бұл жерде мәселе мынада: бізге жүз тарих жасай алатын, бізді бір нәрсеге үйрету қолдарынан келетін жүз адамның тізімін жасау міндет. Бұл үшін біз жұмысы қызықты болуы әбден ықтимал интерактивті портал құратын шығармыз», деді сөзінің соңында министр.
