Үшінші орын Молдовадан келген «SunStroke Projekt» тобына бұйырды.
Осы орайда, қазақстандық әнсүйер қауымның біразының бүйрегі бұрған болгариялық әнші туралы аз-кем айта кетейік. Кристиан Костовтың анасы Зәуреш есімді қазақ қызы. «Eurovision-2017» байқауының іріктеу кезеңінде оза шапқан өнерлі жігіт таяуда «Егемен Қазақстан» газетіне сұхбат беріп, өмір жолы мен өнер жолы туралы айтқан еді.
– Бойымдағы өнер атамнан берілген десем, артық айтпаймын. Сіздер менің Сейфолла атамды көрсеңіздер ғой. Жүрген жері думан, кез келген отырыстың жұлдызына айналады. Жалпы, біз отбасымызбен өнерге жақынбыз. Анам мен тәтем екеуі караокенің ханшайымдары. Кіші бауырларым Арман мен София Мәскеудегі атақты В.С.Локтев ансамблінің хорында өнер көрсетеді,– деп ақтарыла айтқан болатын.
Болгариялық бозбалаға бүйрегіміз бұрғанының тағы бір себебі, 12 жасында Ресейде өткен халықаралық байқауда жерлесіміз, талантты музыкант Батырхан Шүкеновпен жұптасып өнер көрсетіп, көрермен көзайымына айналған еді.
Биылғы жылы бұрнағы жылдармен салыстырғанда қазақстандық көрерменнің көңілін көбірек аударған «Eurovision-2017» тарихқа айналды. Сахнада бекер тер төгіп жүрмегенін дәлелдеген Кристиан Костов халықаралық ән байқауында миллиондардың назарын аударып, екінші орынды жеңіп алуының өзі жас әнші үшін үлкен жетістік екені даусыз. Мөлдір үнімен талайларды тамсандырған, нағашысына тартқан бозбаланың бағындырар биіктері әлі алда деп сенейік.
Арнұр АСҚАР,
«Егемен Қазақстан»
