Қазір еліміздің әрбір өңірінде ел Тәуелсіздігінің 25 жылдығын мерекелеуге арналған іс-шаралар өткізілуде. Осыған орай, кеше Ішкі істер министрлігінде де осы ведомство басшылығының, ішкі істер органдары қызметкерлері мен ардагерлерінің қатысуымен салтанатты жиын болып өтті.
Оркестрдің сүйемелдеуімен министрлік туы сахна төріне шығарылып, Әнұран шырқалғаннан кейін құттықтау сөзді министрдің бірінші орынбасары Марат Демеуов алды. Ол өз сөзінде жиырма бес жыл ішінде еліміз тұрақты, дамыған, халқы тату мемлекет ретінде қалыптасқандығын және әлем алдындағы беделін айқындағанын ерекше атап көрсетті.
«Тәуелсіздік – баға жетпес асыл байлығымыз. Еліміздің жаңа және жарқын тарихының бастауы. Еліміз айтулы әлемдік шараларды: ЕҚЫҰ Саммитін, Қысқы Азия ойындарын абыроймен өткізе білді, енді алдымызда ЭКСПО-2017 халықаралық көрмесін зор табыспен өткізу міндеті тұр. Мұның барлығы Президент Нұрсұлтан Назарбаевтың көреген саясатымен тікелей байланысты», – деді Марат Ғанұлы.
Сонымен қатар, министрдің бірінші орынбасары еліміз дамуында ішкі істер саласының орны ерекше екендігін де қаперге сала кетті. Тәуелсіздіктің алғашқы жылдарынан бастап ішкі істер органдары қызметкерлері қоғамдық қауіпсіздікті қамтамасыз етуде және азаматтарды қылмыстық қолсұғушылықтан қорғауда лайықты қызмет атқарып келеді. Тәуелсіздік алған жылдар ішінде ішкі істер органдарының 1093 қызметкері мемлекеттік наградаға ие болыпты. Олардың екеуіне Халық Қаһарманы атағы да берілгендігін айта кеткен орынды.
Бұдан кейін ішкі істер органы мен Ұлттық ұлан ардагерлері республикалық кеңесінің төрағасы, милиция генерал-майоры Өмірзақ Болсамбеков Тәуелсіздіктің мағынасы еркіндік, теңдік, бостандықпен байланысты екендігін алға тарта отырып, елге тыныштық пен береке тілеген игі лебізін жеткізді.
Құттықтаулардан кейін ҚР ІІМ орталық аппараты мен аумақтық бөліністерінің қызметкерлеріне мемлекеттік және ведомстволық наградалар тапсырылды. Оны Ішкі істер министрі Қалмұханбет Қасымов табыстады. Солардың арасында ІІМ-нің М.Бөкенбаев атындағы Ақтөбе заң институтының басшысы, полиция полковнигі Сәлімгерей Қарақұшев те бар. Ол ІІ дәрежелі «Айбын» орденімен марапатталды. Бұқаралық ақпарат құралдары өкілдерінің алдында сөйлеген сөзінде орден иегері еліміздің ерлер еңбегін бағалайтындығына ризашылығын жеткізе отырып, бұл марапат ішкі істер органдарына білікті мамандарды даярлаудағы еңбегі үшін берілгендігін алға тартты. Сонымен қатар, ел Тәуелсіздігінің 25 жылдығын мерекелеуге орай ішкі істер органдарының қызметкерлері ведомстволық наградалармен және грамоталармен марапатталды. Іс-шара қорытындысында ішкі істер органдары қызметкерлері арасында өткен «Менің елім!» патриоттық әндер байқауының лауреаттары мен дипломанттарының қатысуымен гала-концерт қойылды.
Асқар ТҰРАПБАЙҰЛЫ,
«Егемен Қазақстан»