Тимощук: Ұзақ әрі күрделі маусымды өткіздім

«Қайрат» футбол командасының бұрынғы жартылай қорғаушысы Анатолий Тимощук мансабын қайда жалғастыратынын мәлімдеді. Бұл туралы vesti.kz хабарлады. Украиналық футболшының жақында алматылық командамен арадағы келісімшарт мерзімі аяқталған. Бұдан кейін ол Киев қаласына келіп, жаттықтырушылық курсын аяқтап жатыр. «Қандай жағдай болмасын, спортта қаламын деген ойдамын. Қазір футболшы ретіндегі мансабымда қайда жалғастыратынымды ойластырып жатырмын. Бәлкім, бапкерлік жолымды да бастап кетермін», – деді ол. Мұндай тәжірибелі ойыншыға сұраныс көп болары белгілі. Бұл туралы: «Әрине, ұсыныстар көп. Бірақ көбісі жаттықтырушы ретінде шақырады. Ұзақ әрі күрделі маусымды аяқтағандықтан алдымен демалысты ойлағым келеді. Оның үстіне Еуропа чемпионаты да біраз күшімді алды. Жазда демалып үлгермегендіктен қазір аздаған үзіліс алғым келеді. Ал қалғанын содан кейін шешемін», – деді «Қайраттың» экс-хавбегі. Айта кетейік, 37 жастағы Тимощук қазақстандық клубқа 2015 жылдың жазында ауысып келген. Екі маусымда ол ҚПЛ-де 34 матч (бір гол, екі нәтижелі пас), ел Кубогында 5 матч, сондай-ақ Еуропа лигасында 10 матч өткізді. «Қайрат» сапында Қазақстан кубогын бір рет жеңіп алса, ішкі біріншілікте екі рет күміс медальді еншіледі.