Отансүйгіш патриоттары бар ел бақытты

Кешегі күні кеншілер қаласы – Екі­бас­тұзда басталған республикалық III Патриоттар форумы ары қарай облыс орталығында жалғасты. «Бірлігіміз жарасқан!» атты рес­публикалық жастар форумына еліміздің әр облысынан топ-топ болып, жүздері жарқын алау жастық көңілмен мыңға тарта студент жастар келді. Еліміздің егемендігі мен елдігін паш ететін мемлекеттік рәміздерімізді ардақтайтын отансүйгіш жастар шеруі Ертіс өзені жағалауынан басталды. Көк байрақ туды көтерген патриот жастар облыс орталығындағы «Даңқ» алаңында батырлар рухына тағзым етті. Ұлттық рәміздер еліміздің өткені және болашағы арасындағы сабақтас­тық­ты білдіреді. Халқымыздың рухын, ұлт­тық санасын, қаһармандығын, даналы­ғын айшықтайтын еліміздің жаңа та­рихы­ның қастерлі беттері деуге болады. Ендеше, жастарды пат­риот­тық сезімге тәрбиелеуде оның мән-мағы­насын түсін­ді­руіміз керек. Форумның да көз­деген мақ­саты осы. Бұл жөнінде Қа­зақ­стан Жастар конгресінің атқарушы дирек­то­ры Нұрлан Сыдықов мәлімдеді. Форум аясында жастар шеруі ұйым­дас­тырылды. Мақсаты – әрбір жастың бой­ында өзінің Отанына деген, өз елінің рәміздеріне деген құрмет сезімін ояту. Иә, Отанның өзі осы желбіреген көк тудан, елдік белгілерден, әнұраннан баста­ла­ды. Бүгін олардың жүздерінде ерекше бір толқу бар. Бір мезетте бүкіл еліміздің жастары орындаған ән­ұран біздің облыс орталығында да шыр­қал­ды. «Менің елім, менің Қазақстаным» деген сөздер туған жерге деген сүйіспеншілікті, болашаққа деген сенімділікті айшықтады. Отанға деген шексіз құрметті бір-ақ сөзге сый­ғызып тұр. «Мен бірлігі жарасқан елдің ұланы­мын» деген жастар шеруі «Даңқ» ала­ңы­на келіп жетті. Осы жерде Халық Қаһ­ар­м­аны Ба­қыт­жан Ертаев сөз сөйледі: «Біздің бабалары­мыз жеңіс алып келді. Біз тарихқа бас иеміз. Еліміз жасасын, жастар осы жолды жалғастырсын! – деді ауған соғысының ардагері. – Бұл күндері еліміздің көк байрағы басқа да тәуелсіз мемлекеттердің туларымен қатар Біріккен Ұлттар Ұйымының Нью-Йорктегі штаб-пәтерінде желбіреп тұр. Олимпиада кезінде еліміздің спортшылары құрметіне көтеріледі. Елтаңбамыз ұлттық теңге­мі­зде бейнелеген. Мемлекеттік рәміз­дер ға­рышкерлермен бірге көк жүзінде, ға­рышта да болып қайтты». Міне, осындай құндылықтарды жастар білулері үшін жыл сайын Рәміздер күні аталып өтеді. Жігерлі жастардың мерекелік шеруі еліміздің құныдылықтарын қастерлеп, мәртебесін асқақтатып, жас­тар­ды бір жерге топтасуға үндейді. Бәрі де осы бір күннің шынайы мәнін ұғып, қолдарына ұстаған көк туларын желбіретіп, әсем жағалауды нағыз мерекеге ай­нал­дырды. Шеруге қатысқан жастар Рә­міздер күні бірліктің, татулықтың, дос­тық­тың мекені елімізге арнап әндер шыр­қады. Сонымен қатар, «Көк байрақ туы­мыз», «Мәңгілік елтаңба», «Қасиетті ән­ұран» деп аталған шеру бағытымен мем­ле­кеттің елдік, егемендік ұлық белгілерін көте­ріп, облыс орталығының көшелерін аралап жүріп, «Астана» мұз айдыны са­райына келді. Осы жерде «Қазақстан патриоттары­ның форумына» қатысушылар, олардың ара­сын­да жастар, студенттер, білімді сайыскер жеңімпаздар, спортшылар бар, біргеміз – берік іргеміз, деп өздерінің 2007 жылдан бастап аталып келе жатқан еліміздің Рәміздер күнін құрметтеп, оған бас иетіндерін жеткізді. Жүздері бал-бұл жанған жастар – «Жас Отан» жастар қа­на­тының мүшелері кеуделеріне қолдарын қойып, көк тудың қасына келіп тұрды. «Біздер жас патриоттар еліміздің көк туын әрқашан берік қолда, мықты ұс­таймыз, Отан біреу, жастар әрқашан сенімен бірге», десті олар. Екінші қатардағы сахна төріне спортшылар Елена Хрусталева, Мұх­тар­хан Ділдәбеков, ауған соғы­сы­ның ардагері Бақытжан Ертаев, жерлесіміз, бейбіт күні ерлік көрсеткен капитан Қадіржан Қазы­баев, атақты әнші Роза Рымбаева шақы­рыл­ды. Әнші: «Отанын сүйетін осындай пат­риоттары бар ел ба­қытты», – деді. Расында да, бірі әсем ән­дерімен, бірі спорттағы жеңісімен елдің туын, рухын биік көтерген, енді бірі Отанын қорғап батыр атанған патриотттар, міне, осылай жастарға үлгі-өнеге болуда. Үшінші қатарға соғыс ардагерлері келіп қосылды. Үш ұрпақ өкілдері осылай кездесті. Барлығына да Елбасы Нұрсұлтан Назарбаевтың «Қазақстандық жол» атты кітабы сыйға тартылды. Рә­міз­дер күні құр­метіне шығарылған арнайы құрметті белгілермен марапатталды. Біз осы жерде Солтүстік Қазақстан облы­сынан келген Динара Берікқызымен пікірлестік. Ол: «Жүрегі жерім, елім деп соққан әрбір патриот жас үшін бұл күн ерекше күн деп ойлаймын. Осындай мереке күнінің болғаны керек, рәміздердің қасиетін әрбір жас ұғынып, оны қадірлеп өсуі тиіс, патриот деген жай ғана сөз емес, өзің өмір сүрген ел үшін қызмет жасау, қажет кезінде Бақытжан ағалардай күресе де білу», – деді. Керекулік Ерке­бұлан Алдабергенов болса: «Мен өзімді елімнің шынайы патриотымын деп санаймын. Өзбекстаннан көшіп келдік, не үшін келдік сонда, әрине, қазағым, елім, жерім деп келдік, енді осы елдің бірлігі, болашағы үшін қызмет жасаймын, жастар ана тілдерін сүйсін, құрметтесін, барлығы ана тіліңді сүюден басталады ғой», – деді. Кең көлемді экраннан еліміз халық­тары­ның бірлігін айғақтайтын көріністер көрсе­тілді. Осы кең экран арқылы елі­міз­дің әр облысымен тікелей байланысқа шыққан жүргізушілер Петропавл, Шым­кент, Аты­рау, Өскемен жақтарда өтіп жатқан форум мақсатына сай сол жерлерде тұратын елін, жерін сүйетін патриот­тардың жүрекжарды лебіздерін білдірулеріне мүмкіндік жасады. Ел мен жерге деген патриоттық тақырыпта әндер орын­даған өнерлі топтар рәміздер күні мерекесінің сәнін де мәнін де келтірді. Фарида БЫҚАЙ. Павлодар облысы.