Дәстүр мен жаңашылдық жаршысы

Әл-Фараби атындағы Қазақ ұлттық университетінің  ұйымдастыруымен Қазақ радиосының 95 жылдығы, «Шалқар» радиосының 50 жылдығы және журналистика факультетінің студенттік «Сана – әл-Фараби» радиосының 20 жылдығына арналған республикалық ғылыми-тәжірибелік конференция өтті. Мемлекеттік мүдде мен ұлт­­тық мұратқа, жалпы адам­зат­тық құндылықтарға бағат беруде электронды  БАҚ ішінде радио­ның орны бөлек. Ең алғаш­қы хабарын Қазақстанның тұңғыш астанасы Орынбор (Ре­сей) қаласынан таратудан бас­таған Қазақ радиосы осынау өткен жылдар ішінде даму жолдарының барлық сатысынан өтті. Бүгінгі Қазақ радиосы 9 тілде, аптасына 148 хабар дай­ындайды. 2011 жылдың 18 шіл­десінен бастап тоқтаусыз он­лайн-трансляция жүргізіп келеді. Сол секілді 1966 жылдың 1 қаңтарынан үзбей әуе толқынына шығып, хабар таратып, ұлттық сазбен тыңдарманын тербетіп келе жатқан «Шалқар» радиосының бағдарламасын бүгінде  әлемнің әр түкпірінен-ақ тыңдауға болады. Екі радио да университет аудиториясында болашақтың білікті мамандарын – радиожурналистерін дайындауда елеулі үлес қосып отыр. Атақты оқу орнындағы «Сана – әл-Фараби» радиосы осынау кәсіби байланыстың жарқын көрінісі іспетті. Тартымды өткен басқосудан соң «Қазақстан» РТРК АҚ бас­­қарма төрағасы Кемелбек Ойшы­баев қазақ радиосының бір топ ардагеріне сый-сияпат көрсетті. Сондай-ақ, радио қыз­метіндегі жеңімпаз студенттерге арнаулы шәкіртақылар табыстады. «Ең үздік студенттік радио­бағ­дар­ламасы» аталымы бойынша жеті студент ақшалай сыйлық алды. Конференцияға Қазақ радиосы мен «Шалқар» радиосының ардагерлері, бұқаралық коммуникация саласын зерттеуші ғалым­дар, қазақстандық электронды БАҚ өкілдері, журналистика факультетінің студенттері мен магистранттары, докторанттары қатысты. Қызықты өткен ғылыми жиында аталған мәселелердің аясында айтылған ұсыныстар мен барлық кепілдемелер жинақ түрінде жарық көреді. Талғат СҮЙІНБАЙ, «Егемен Қазақстан» АЛМАТЫ