Ел нәсібін еселеген

Ауыл шаруашылығын қаржылай қолдау қорының қамқорлығы Бүгінде ауыл тұрғындарын жұмыспен қамтып, оларды кәсіпкерлікке тарту міндеті күн тәртібінде тұр. Елбасының бұл тапсырмасын орындаудың тиімді бір жолын «Ауыл шаруашылығын қаржылай қолдау қоры» АҚ ұсынып, аграрлы салада жақсы нәтижеге жетіп отырғанын ауыл халқы растауда. Алматы облысының Қаратал ауданындағы Үштөбе ауылының тұрғыны Қайрат Баекенов тұрақты жұмыс орнын таба алмай жүрген жандардың бірі еді. Жалдамалы жұмыс, жеке автокөлігімен адам тасу секілді күнкөріс көздерін істей жүріп аудандағы Жұмыспен қамту орталығына жұмыссыз санаты бойынша тіркелген болатын. Көп ұзамай «Жұмыспен қамтудың жол картасы-2020» мемлекеттік бағдарламасы аясында несиелеуге жолдама алды. «Ауыл шаруашылығын қаржылай қолдау қоры» АҚ жүзеге асыратын «Береке» бағдарламасына сәйкес мал бордақылауды дамыту бағытында жұмыс бастауға жолы ашылды. Заңнама талабына сай ауыл шаруашылығы саласы мамандарының көмегімен құжаттар еш кедергісіз толтырылып 1,6 миллион теңгені 4 жылға жылдық 6 пайыздық үстемемен лезде алғанында абдырап қалғаны да ақиқат. Себебі, жылдар бойы ауылда жұмыссыз жүрген жанның отбасын асырау, өсіп келе жатқан балаларды оқыту, киіндіру секілді сан алуан мәселелері жетіп артылатын. Содан нар тәуекелге салып, бірден 10 бас ірі қара сатып алды. Тонналап мал азығын да дайындап үлгерді. Сабақты ине сәтімен дегендей, ісі алға басып берді. Мал басын сақтап, өсімінен түскен пайданы шып-шырғасын шығармай келісімшартта көрсетілген кестеге сәйкес, тоқсан сайын 114 мың теңгеден қорға құйып отыр. Шыны керек, «Бал ұстаған бармағын жалайды» дегендей, жемшөп сатып алу, уақтылы малдәрігерлік қызмет көрсету секілді қажеттіліктерден асқан қаражат отбасы керегін толық өтеп отыр. Ең бастысы – «Береке» бағдарламасы үйдің берекесін кіргізді. Үштөбелік Қайрат Баекеновтің осынау ілкімді ісі ауылдастарына ғана емес өңір халқына үлгі болуда. Ауылдастары үлгі тұтып қана қоймай, «Адамның істегенін адам істейді біз неге алға ұмтылып «Береке» бағдарламасымен берекемізді кіргізбейміз?» деп отырғанын жасырып қайтеміз. – Басты мақсатымыз – ауылды жердегі кәсіпкерлікті дамыту, – дейді «Ауыл шаруашылығын қаржылай қолдау қоры» АҚ Алматы облыстық филиалының директоры Мәди Ибадуллаев. – Мемлекеттік саясатқа сай еңбек етемін деп ұмтылған жанға бірінші қажеттілігі болып табыла­тын қаражат мәселесін шешуге көмектесеміз. Сөйтіп, қолжетім­ді әрі төменгі пайызбен ауыл шаруашылығы саласына шағын несие береміз. 2016 жылы «Береке» бағдарламасының ұстанымы нақтыланып, Алматы облысына «Жұмыспен қамтудың жол картасы-2020»-ның екінші бағыты бойын­ша қарастырылған 2,9 млрд теңгенің 80 пайызынан астамы мал бордақылау саласына бөлінді. Филиал 150 алаң­ды қаржыландыруды жоспарлап, биыл 857 отбасылық мал бордақылау алаңын ашуға 2,8 млрд теңге бөлді. Аграрлы облыс тұрғындарының негізгі күнкөріс көзі мал бағып, жер өнімдерін өсіру болып саналады. Тек ұқсата білген дұрыс. Бұл ретте қоңы тайған малды арзан бағаға сатып алып, бордақылап сатудың пайдасы мол. Саралай білген адам таза еңбектің өтеуін көреді. «Береке» бағдарламасы аясында қолжетімді әрі төменгі пайызбен несие алған азаматтар, отбасыларын асырап, ауылдастарына жұмыс орнын ашады, сауда нүктелеріне ет тапсырады. Мемлекетке тиісті салық төленетіні өз алдына. Отбасылық шағын ғана мал бордақылау алаңы біртіндеп ұлғаяды. Ауқымы үлкейген сайын жауапкершілігі де артады. Мемлекет тарапынан мұндай шаруашылықтарды коо­перативтерге біріктіру жұмыстары да қолға алынды, ал коо­перативтің мүм­кіндіктері бұдан да көп. Шағын бор­да­қылау алаң­дарының көбеюі нәтижесінде экология­лық таза өнімді жергілікті сауда орындарына жеткізетін кәсіп­кер­лермен қатар, экспортқа шығаруға өзіндік үлес қосушылар анық­талып, іріктелетіні тағы бар.  Әлия ЕҢСЕБАЕВА Алматы облысы