Қайта жанданған кәсіпорын

Арқа өңіріндегі кенді атырап Қарағанды қаласындағы «Tau-Ken-Temir» ЖШС-нің жұмы­сы 2014 жылдан бастап қай­та жанданды. Естеріңізге салсақ, бұның алдын­да зауыт «Silicium Kazakhstan» атауымен белгілі еді. Алайда, өн­ді­ріс төңірегіндегі дау-дамайларға байланысты оған жұмысын тоқтатуға тура кел­ген. Кәсіпорынның қайта іске қосылуы үшін мемлекет тара­пы­нан көмек көрсетіліп, «Тау-Кен Самұрық» ұлттық тау-кен компаниясы 1,4 млрд тең­ге бөлген болатын. Бүгінде зауыт жұмысының нәтижесі жыл­дан жылға артып келеді. Толық­қанды өн­ді­р­іс­тік қуатқа келер жылдан қол жеткізбек. Биылдың өзінде өндіріс ошағы 19,5 мың тонна техникалық кремний шығаратын болады. Бұл былтырғымен салыстырғанда екі есе көп. Қолданылатын өн­діріс құралдары неміс компания­сы ұсынған соңғы технология­лар­мен жасалған. Ал қажетті шикі­зат «Ақтас» кварц шығару кен орнынан тасымалданады. Жез­қазғаннан 130 шақырымда орна­ласқан бұл жердің қорында 4 млн тонна кварц бар. Кәсіпорынның қайта түлеуі өңір тұрғындарын жұмыс­пен қамтуда үлкен септігін тигіз­ді. Қазіргі уақытта зауытта 364 адам еңбек етеді. Әр­қайсысы жоғары білікті мамандар әрі олардың білімін шыңдау мақсатында бірқатар жұмыстар іске асырылып жатыр. Айта кету керек, бұрынғы кәсіпорынның қызметкерлері де жұмыссыз қалған жоқ. Мәселен, ТС бойынша жетек­ші инженер Сергей Коробко өндіріс орнының негізі қалан­ғалы жұмыс жасайды. – Зауыт іске қосылғалы бері жұмыс жасағандықтан, салыстыра аламын, қазір бұрынғымен са­лыс­­тырғанда жұмыс жасау үшін әлдеқайда қолайлы жағ­дай жасалады, әлеуметтік тұрғыдан алған­да да ісіміз оңға басуда. Жұмыскерлер үшін тиімді болғандықтан шығар, 70 па­йызға жуық маман бұрын­ғы кәсіпорыннан орналасты. Ола­р­дың білімін жетілдіруге бас­шы­лық тарапынан әрдайым қол­дау көрсетіледі. Бәріміз де бір мақсатты ұстанамыз, ол – нәти­желі еңбек ету. Қазіргі уақытта басты жоспарымыз – өзіндік құны барынша төмен өнім өндіру. Бұл, әрине біздің де материалдық тұр­ғыдан алғанда өсуімізге тікелей септігін тигізеді, – дейді ол. Бүгінде кәсіпорын ІСО-9001 халықаралық менджмент сапасы жүйесінің талаптарына жауап бере алады. Шығарылатын өнімге берілген жоғары баға алдағы уақытта шетелдік нарыққа шығуға жол ашты. Өндіріс ордасының басқарма басшысы Мұрат Жүкенов «қазіргі уақытта дайын өнімнің 50 пайызға жуығы Солтүстік Америкаға, 40 пайызы Еуропаға, қалғаны Ресей мен Беларусь мемлекеттеріне тасымалданады», дейді. Сонымен қатар, ол алдағы жылы зауытты 21-23 мың тонна өнім шығаратын өндірістік қуатқа шығаруды жос­парлайтындарын жеткізді. Әлемдік нарықта елімізде өндірілетін кремнийге деген сұ­ра­ныс жоғары. Бұған бір­ден-бір себеп, оның жоға­ры тех­­но­логиялар үшін қа­жет­тігі. Құ­ры­­лыстан бас­тап заманауи тех­никалық құ­рыл­ғылар өнді­рісіне дейін қол­данылады. Бұдан бөлек, зауыт бас­шылы­ғы кезекті инвес­тициялық жоба­ны іске асыруға білек сыбана кірі­су­де. Ендігі кезекте олар өз өнді­ріс­тік қалдықтарынан өнім шы­ға­ру мақсатын алға қойған. Бұл кә­сіп­орын­ның қоршаған ортаға зиян­ды заттарды шығаруын тежеп, эко­логияға барынша аз залал кел­тіру­ге септігін тигізеріне сенімді. Қайрат ЖҮНІСҰЛЫ ҚАРАҒАНДЫ