Өзекті мәселелер өз шешімін табуда

Еліміздің барлық өңірлерінде «Қазпошта» бөлімшелері жаңарту бағдарламасынан өтпек. «Самұрық-Қазына» әл-ауқат қорының транс­формациялау бағдарламасы ая­сында алға қойған мақсаты – 100 бөлімше тұтынушыларына қолайлы жағдай жасау. Ел егемендігінің жиырма бес жылдығына орай ұйымдастырылып жатқан жоба аясында Сыр елі жаңа қызметтерге қол жеткізуде. Бұл ретте, қолдану­шылардың талаптары ескерілгенін айта кеткен жөн. Мәселен, жұрт­шылықтың біраз бөлігі кезекте тұрған уақыттың көптігін айтқан болатын. Ендігіде сәлемдемелерді кезексіз, тіпті кез келген уақытта алу мүмкіндігі ұсынылмақ. Тұтынушыларға қолайлы болу үшін «сәлемдемелер супер­маркеті» іске қосылады. Бұл дегеніміз, сәлем-сауқат келген тұр­ғынға СМС-хабарландыру жіберіледі, кейін ол өз пошта бөлім­­шесіне өтіп, бар болғаны бір­неше минуттың ішінде кезексіз өз заттарын ала алады. «Қазіргі уақытта корпоративтік клиенттеріміз үшін арнайы аймақ ашу жоспарлануда. Сонымен қатар, банкомат, терминал мен постомат құрылғылармен толық қамтылған, 24 сағат қызмет көр­сететін өз-өзіне қызмет көрсету аймағы да іске қосылмақ», дейді «Қазпошта» АҚ Қызылорда фи­лиа­лы­ның директоры Әнуарбек Әбдімомынов. Қажетті құрылғылардың барлығымен қамтылған өзіне өзі қызмет көрсету мен сәлемдемелер супермаркеті тұтынушылардың біраз уақыт бойы шағым түсірген «кезек күту» мәселесінің бірден-бір шешімі болып отыр. Сонымен қатар, байланыс бөлім­шелерінің барлығы да бірың­ғай электронды кезек жүйесі­мен, бейнебақылау және өрт қауіп­сіздігімен қамтамасыз етілмек. Көңілге қонар игі бастамалардың тағы біреуі – мүмкіндігі шектеулі жандар мен сәбилі келіншектер үшін қолайлы жағдай жасау. Жаңартылған  бөлімдер валюта айырбастау, ақша аударым­дарын жүргізу кассаларымен де қам­тылмақ. Халық игілігіне қызмет етуді негізге алған «Қазпошта» АҚ өкілдері әлі де өзгерістер орын аларын жеткізді. Ал жеке тұлғалар мен кор­пора­тивтік клиенттер үшін арнайы аймақтар қарастырылған. Бұрын пошта қолданушылары белгілі бір қызмет үшін айтарлықтай уақытын жоғалтатын болса, енді өзіне тиімді кезде келіп, қажет­ті жұмыстарын бірнеше минут ішінде іске асыра алады. Осы тектес жұмыстар әлі де жалғасын табады. Клиенттердің талабына жауап беруге тырысатын «Қазпошта» АҚ-тың алға қойған мақсаттары мол. Азиза ЕЛЕМАН  ҚЫЗЫЛОРДА