«Egemen.kz» сайтын еркін оқиды

Ұлт ұстазы Ахмет Байтұрсынұлы түзген төте жазуды Қытайдағы қандастарымыз осы күнге дейін қолданады. Соңғы төрт айдан бері «egemen.kz» сайтының төте жазуға аударылатын беті қайта жанданды. Қашанда атажұрттың жаңалықтарына елеңдеп отыратын қандастарымыздың өздеріне үйреншікті жазу үлгісіндегі сенімді ақпарат көзіне ықыластары ерекше. Сайттағы мақалалардың оқылы­мына қарап отырып, олардың еліміз­дегі саяси, рухани, әлеуметтік тақы­рыптарға қызығушылығы жоғары екенін байқауға болады. Мысалы, Елбасы Н.Назарбаевтың «Ұлы Дала ұлағаттары» кітабының «Қиырдан келсе қандастар» атты төртінші бөлімін 7000-нан аса адам оқып, көптеген оқыр­ман ризашылық пікір­лерін жазып қалдырған. Бұл, әрине, газет сайтының оқылым көлемі. Бұдан бөлек, «Егеменге» сілтеме жасай отырып, мәтін­ді өзде­рінің әлеуметтік желі­ле­ріне жария­лай­ды. Сол арқылы әрі қарай неше жүз мыңдаған қандастарға қол­жетім­ді ақпаратқа айналып отыр. Екіншіден, қандастардың Қазақстанға көшуі мен орналасуы жөніндегі шынайы ақпараттарға сусап отырғаны бай­қалады. Жақында, Солтүстік Қазақстан облысындағы мен­шікті тілшіміз Өмір Есқалидың Қызылжар ауданына қоныс­танған қандастар жайында жазған «Берекелі «Бәйтерек» атты мақаласын Қытай елінде мыңда­ған оқырман оқып, қызу талқылаған. Сайтта оқырман өз ойларын, ұсы­ныс-тілектерін оңай қалды­ра алатын қолайлы тетіктер қарасты­рылғандықтан материалдарға байланысты пікірлер де көптеп жазылуда. Мәселен, былғары қолғап шебері Қанат Исламға байла­нысты материалдың өзіне 40-тан астам пікір жазылған. Сонымен қатар, елі­міздегі ақын-жазушылардың шығар­малары да төтешеге аударылып шеттегі оқырман назарына ұсынылып келеді. Қалқаман Сарин, Құралай Омар, Есбо­лат Айдабосын сынды қалам­герлер шығар­­малары жақсы қызы­ғу­шы­­лық тудырып, көптеп таралуда. «Шыны керек, ресми ақпарат көзі болмаса әлеуметтік желідегі желдей ескен ақпараттарға сене бермейміз, оның үстіне оны түрлі пиғылдағы адамдар таратады. Тіпті, Қазақстанды жағымсыз жағынан көрсетуге тырысып жататындар да, екі ел азаматтары арасында түсініспеушілік туды­руы мүмкін ақпараттарды салушылар да болады, сондықтан бізге «egemen.kz» сайтының төте жазуға арналған «egemen.kz/tote» нұсқасы өте қажет», дейді Есен Озат атты қандасымыз. Сайттың төте жазу бетін қолда­ну­шылардың бір бөлігін Қытайдан елімізге келген қан­дастар құрайды екен. Олар әлеу­меттік саладағы түрлі өзге­ріс­терді сайт бетінен жылдам оқып, толықтай мағлұмат алып, жаңа ортаға бейімделуде. Биылғы Елбасы Жол­дауын сайт­тың төте жазу бетінде бү­гінге дейін 2000-нан аса оқыр­манның оқып, талқылап жатуы да қандастардың қазіргі Қазақстан қоғамына бей-жай қарамайтынын көрсетеді. Ұларбек НҰРҒАЛЫМҰЛЫ, «Егемен Қазақстан»