Елбасының жаңа Жолдауының ерекше сипаты – мемлекетіміздің қазіргі замандағы дамуының түбегейлі тұстарын зерделеп, оның сан қырлы салаларын жүйелі түрде жаңғырту мәселесіне мән беруінде. Тәуелсіздігінің ширек ғасырын атап өткен ел үшін болашаққа сенімді қадам жасау өзекті екені белгілі. Стратегиялық мазмұны бар құжатта анықталған бес басымдықтың әрқайсысы еліміздің бүгіні мен ертеңі үшін аса маңызды. Экономиканың жаңа драйверлеріне үлкен үміт арта отырып, Елбасы осы басымдықтарда транзитті қоғамның заманауи кезеңіне сәйкес келетін өзіндік ерекшеліктеріне тоқталады. Демек, қазіргі заманның нағыз дамыған өркениетті елдерінің қатарына қосылу үшін ескі экономикалық жүйені ғана емес, сонымен қатар, қоғамдық сананы да өзгертуге тиіспіз деген ойды ортаға салады. Шын мәнінде, Жапония, Корея, Сингапур, Тайвань, Малайзия сияқты Оңтүстік-Шығыс Азияның бірнеше елі батыл қадамдардың арқасында өздерінің әлеуметтік инфрақұрылымын, экономикасын ХХ ғасырдың аяғында түбегейлі өзгертіп, үлкен өркениеттік секірістер жасады. Сондықтан, оларды «Азия жолбарыстары» деп атайды. Әрине, жоғарыда аталған елдердің барлығы әрқилы даму сатыларынан өтті, сонымен қатар, әрбір елдің өзіндік қиындықтары, дараланған соқпақтары да болды. Олардың жүрген жолдарына, әлеуметтік тәжірибесіне назар аударғанмен, біздер тікелей көшірме жасай салмайтынымыз анық. Қазақстан жас мемлекет болғанымен, өзіндік ерекше жолы бар, әлеуметтік прогресс туралы өзіндік түсініктері бар ел. Мәселен, қоғамымызда соңғы жылдары белсенді түрде жасалып жатқан көптеген мемлекеттік реформалар әлемде баламасы жоқ дүниелер болып табылады. Оларды дағдарыстардан өту бойынша бұрын-соңды тарихта көрініс бермеген қадамдар десе де болады. Мәселен, «Нұрлы жол» бағдарламасы мен «100 нақты қадам» Ұлт жоспары сияқты құжаттардың әлеуметке кенеттен келген дағдарысты кезеңнен абыроймен шығу үшін үлкен демеу болғаны, бағдар болғаны анық. Нұрсұлтан Назарбаев шынайы Көшбасшы ретінде өзінің сөйлеген сөздерінде технологиялық жаңғырулармен қатар, азаматтарымыздың дүниетанымындағы сапалы өзгерістердің болғанын, технологиялық жаңғыртулар заманында инновациялық ойлаудың, мәдениеттің даму барысында жетекші рөл атқаруға тиісті екенін айтып келеді. Қазіргі заманның сан астарлы талабы, сын-қатерлері Қазақстан жұртшылығын да айналып өтпейді. Біз де әлемдік дамудың, жаһандану үдерістерінің ауқымындамыз, сондықтан әрдайым өзіміздің ұлттық келбетімізді, рухани мәдениетімізді жоғалтпай, кемелдене беруіміз керек. Осыған орай қазақ, орыс және ағылшын тілдерін жас ұрпақтың меңгере түсуіне аса мән берілген. Еліміздің педагогтар корпусына осы салада үлкен зияткерлік жүк артылып отыр. Жолдауда инновациялық үдерістердің әлеуметтік дүниенің барлық саласын қамтитыны айтылды. Медицина мен білім беру саласы, сауда мен кәсіпкерлік жүйесі, сонымен қатар, мемлекеттік қызметтің барлық салалары «Цифрлық Қазақстан» бағдарламасына арқа сүйеп, тиімді қызмет көрсетуі тиіс екені атап көрсетілді. Әлемнің озық елдерінде шығармашылық еркіндіктің нәтижесінде дамыған салалар қазіргі заманда оларға көптеген қаржылық табыстар әкелуде. Сондықтан, мемлекеттік тексеруші органдардың біршамасына осы факторды ескерген жөн. Қоғамымыздың келешегі үшін барынша шынайы қызмет етіп жатқан кәсіби мамандардың іс-әрекеттеріне барынша мүмкіндіктер жасалғаны абзал. Елімізде 21-рет жарияланып отырған Президентіміздің Жолдауы экономикадағы технологиялық пәрменді дамумен қатар, әлеуметтік дүниедегі қайшылықты мәселелердің шешімін іздеуге шақырады. Мәселен, діни экстремизм мен радикализм мәселелері қоғамымыздың ішкі рухани тұрақтылығына, мемлекетіміздің қауіпсіздігіне біршама нұқсан келтірді. Осы маңызды мәселелердің тиімді шешімдерін табуда Елбасы тарапынан бірыңғай мемлекеттік органдардың күшімен жазалау тәсілін қолдану ұсынылмайды, керісінше, қоғамдағы қайшылықтың алдын алу қадамдарын жетілдіріп отыру айтылады. Осыған орай, қоғамымызда, барлық аймақтарда, әсіресе, жастар арасында рухани-адамгершілік тәрбиесін жүргізу өзектене түседі. Қоғамымыздың руханиятын жетілдіре түсу үшін, адамаралық қатынастардағы үйлесімділікті нығайта түсу үшін еліміздің жастарды тәрбиелеуші мекемелеріне ғалымдардың, тұтастай алғанда, зиялы қауымның да мықты қолдауы ауадай қажет.
Зарема ШӘУКЕНОВА,
Философия, саясаттану және дінтану институтының директоры, ҰҒА корреспондент-мүшесі
