Ең бастысы – елдің қолдауы

Сенат депутаты Икрам Адырбеков әлемдік экономикадағы жылдам өзгерістер жағдайында құбылмалы әлеуметтік-экономикалық ахуалдағы қазіргі мәселелерді жедел шешу үшін Үкіметтің әрекет ету мүмкіндігі мен қажетті дербестігі болуы керек, деп санайды. Сенатордың пікірінше, Мем­лекет басшысының билік өкілет­тіктерін қайта бөлу және саяси жүйенің өзгерістері жөнін­дегі Үндеуіндегі бастамалар де­мократиялық қоғам қалыптастыру жолындағы тарихи меже болып табылады. И.Адырбеков сенаторлар Мұх­тар Алтынбаев және Ләззат Қиы­новпен бірге Алматы қала­сындағы Алатау ауданы­ның активімен және тұрғын­дары­мен кездесті. Жүздесу бары­сында Мемлекет бас­шысының «Қазақстанның Үшінші жаңғыруы: жаһандық бәсе­кеге қабілеттілік» атты халыққа Жол­дауы­ның басым міндеттері талқы­ланды. Кездесуге қатысушылар Мем­лекет басшысының бастамаларына қолдау білдірді. Сенаторлар, сонымен қатар, Алматы қала­сы­ның тұрғындарымен әлеу­меттік қамсыздандыру және тұр­ғын үймен қамтамасыз ету, ба­ғаны қалыптастыру мен жер­гілікті атқарушы органдардың жұмысы туралы мәселелерді талқылады. * * * Сенаторлар Мұрат Бақтиярұлы мен Бекмырза Еламанов Қызылорда облысына жұмыс бабындағы сапарында Қызылорда қаласының активімен, мәслихат депутаттарымен және қала тұрғындарымен кездесті. Сенаторлар «Атамекен» Ұлт­тық Кәсіпкерлер пала­тасы­ның Қызылорда облыстық бө­лім­шесінде аймақ кәсіпкерлерімен, қаладағы Жастар сарайында өңір жастарымен болған кездесулерде Елбасының Қазақстан халқына Жолдауы, билік тармақтарының өкілеттілігін қайта бөлу жө­нін­дегі конституциялық рефор­малар туралы жан-жақты түсіндіру тұр­ғысында кеңінен әңгіме өткізді. Жолдаудан туындайтын мін­деттер аясында ауыл шаруа­шылығын дамыту, елімізді сапалы азық-түлікпен қамтамасыз ету, оның ішінде күріш дақылын сапалы әрі тиімді өсіру жайы сөз болды. Сенаторлар, сондай-ақ, Парламенттің заң шығару қыз­меті, еліміздің құқықтық ірге­та­сы мен қабылданған заңдар және оны іске асыру барысы туралы жиналғандарды хабардар етті. Сенаторлар облыстың Сыр­дария ауданындағы Айдарлы, Іңкәрдария, Шиелі ауданындағы Бо­табай ауылы және Қармақшы ау­да­нындағы Қуаңдария ауыл­дары­ның тұрғындарымен де кездесті. * * * Сенат депутаттары Бақтыбай Шелпеков пен Михаил Бортник Ақтау қаласының активімен кездесті. Мәслихат депутаттарымен, кәсіпорындар және қоғамдық бірлестіктердің басшыларымен кездесуде сенаторлар Мемлекет басшысы Н.Назарбаевтың «Қазақстанның Үшінші жаңғыруы: жаһандық бәсекеге қабілеттілік» халыққа Жолдауының негізгі мәселелерін жан-жақты әңгімеледі. Сондай-ақ, билік тармақтары арасындағы өкілеттіктерді қайта бөлу мәселелері де талқыланды. Ақтау тұрғындары Мемлекет басшысының бастамаларына оң пікірлер айтып, кеңінен қолдау білдірді. Жүздесу барысында жергілікті кәсіпкерлер несиелерге қол жеткізу, салық салу жүйесінің айқындығы, «Бизнестің жол картасы-2020» бағдарламасы бойынша кәсіпкерлікті қолдау мәселелерін көтерді. Одан басқа, Астанада өтетін ЭКСПО-2017 халықаралық көрмесі аясында «жасыл экономиканы» дамыту мәселелері бойынша мемлекет қолдауы қажет екені айтылды. * * * Сенатор Серік Біләлов Солтүстік Қазақстан облысына жұмыс сапары барысында Жамбыл ауданының тұрғындарымен кездесті. Благовещенск ауылдық округінің мәдениет үйінде өткен кездесу барысында билік тармақтары арасындағы өкілеттіктерді қайта бөлуге қатысты реформалар мен Елбасының «Қазақстанның Үшінші жаңғыруы: жаһандық бәсекеге қабілеттілік» Қазақстан халқына Жолдауының басым бағыттары талқыланды. Сенатор жемшөп, жарма, бұр­шақ пен майлы дақылдар өнді­ретін «Атамекен-агро» серіктестігінде де болып, көктемгі егіс науқанына дайындықпен таныс­ты. Сондай-ақ, сенатор «Династия агро» серік­тестігінің май өңдеу зауытында болды. С.Біләлов сапары барысында Есіл ауданындағы Тарангүл ауы­лы­ның Мәдениет үйінде жергілікті тұр­ғындармен кездесіп, Мемлекет бас­шысының Жолдауынан туындай­тын міндеттерге орай елі­міз­ді жаң­ғырту және саяси ре­фор­ма­ларды жалғастыру туралы бас­та­масына орай жан-жақты әңгі­ме өткізді. Депутат, сондай-ақ, асыл тұқымды мал өсірумен айналы­сатын ауыл шаруашылығы кәсіп­орны – «Азия-Тарангүл» серік­тес­тігінде де болды. Сенатор Ж.Қизатов атындағы Есіл ауылшаруашылық кол­лед­жі­нің қызметкерлері мен сту­дент­теріне Елбасы Жолдауының маз­мұнын таныстырды. * * * Батыс Қазақстан облысында жұмыс сапарымен жүрген Парламент Сенатының депутаттары Рашит Ахметов пен Бірғаным Әйтімова Теректі ауданындағы «Ақас» агрофирмасының және Орал қаласындағы «Батыс Қазақстан электр желілерін тарату компаниясы» акционерлік қоғамының еңбек ұжымдарымен кездесті. Сенаторлар өз сөздерінде Конституцияға енгізу көзделіп отырған негізгі өзгерістер мен толықтырулар жайында айта келіп, Елбасының «Қазақстанның Үшінші жаңғыруы: жаһандық бәсекеге қабілеттілік» атты ха­лық­қа Жолдауының негізгі ережелерін жиналғандарға жан-жақты тү­сін­дірді. Кәсіпорын қызметкерлері Конституцияға енгізу көзделіп отырған өзгерістер мен толық­ты­рулар бойынша заң жобасы мен Мемлекет басшысының Жол­дауынан туындайтын міндеттерді қол­дайтындарын жеткізе отырып, оның маңыздылығы мен уа­­қы­тында жария етілгенін атап өтті. Сенаторлар содан кейін де аймақтағы еңбек ұжымдарымен және оқу орындарында білім алып жатқандармен кездесулерін жалғастырады. * * * Парламент Сенатының депутаттары Қайрат Ищанов пен Сәрсенбай Еңсегенов Атырау облысының Махамбет ауданындағы Сарытоғай ауылының тұрғындарымен кездесті. Жүздесуде билік тармақтары арасында өкілеттіктерді қай­та бөлу мәселелері жөнін­дегі Елбасының Үндеуі мен «Қазақ­станның Үшінші жаңғыруы: жаһандық бәсекеге қабілеттілік» Жолдауын халыққа түсіндіру тұрғысында жан-жақты әңгіме өрбіді. Сенатор Қ.Ищанов Мем­лекет басшысының Жолдауындағы ауыл шаруашылығын қарқынды дамыту, жерді тиімді пайдалану, субсидия бөлу, саланы әр­тараптандыруға қатысты алға қойған міндеттерге кеңі­нен тоқталды. Сондай-ақ, конс­ти­туциялық реформалар жөніндегі ұсы­ныстарды сараптау мен оны заңнамалық тұрғыда қамтамасыз ету қажеттігі туралы ойларын ортаға салды. Сенаторлар Индер ауданындағы Көктоғай ауылында да болды. Депутат С.Еңсегенов: «Қазір заман өзгерді, қоғам жаңарды. Соған байланысты Қазақ елі де бұрынғы жүйемен қалмай, жаңа бағытқа бет бұруы керек. Елбасының халыққа арнаған Үндеуінде осы мәселеге баса мән берілді», – деді. Сенатор Конституцияға енгізілетін өзгерістер мемлекеттік билік тармақтары жұмыстарының нәтижелілігі мен тиімділігін, тепе-теңдігі мен жауапкершілігін арттыратынына сенім білдірді, деп хабарлады Парламент Сенатының баспасөз қызметі.