Грекия ЭКСПО-2017 көрмесіне қатысады

Грекия республикасы ЭКСПО-2017 көрмесіне қатысу шартына қол қойды, деп хабарлады ЭКСПО-2017 комиссарының хатшылығы. 2017 жылғы 9-10 ақпанда ЭКСПО-2017 көрмесінің комиссары Рәпіл Жошыбаев Афиныға жұмыс сапарымен барды. Сапар аясында қоршаған орта және энергетика министрі Георгиос Статакиспен, Экономика және даму министрлігінің бас хатшысы - Грекия ұлттық секция комиссары Илиас Ксанфакоспен, сондай-ақ Грекияның ірі «Enterprise Greece» ұлттық агенттігінің төрағасы Христос Стайкоспен кездесті. Комиссар грекиялық бизнесті халықаралық ІТ-стартаптар технопаркі құрылатын көрме нысандарының мүмкіндіктерін пайдалануға шақырды. Грекия энергетика министрі өз кезегінде Грекия көрмеге халықаралық экологиялық стандарттарға сәйкес энергетикалық инфрақұрылымдарға нақты үлгілер ұсынуға ниетті екенін хабарлады. Жерорта теңізі елі жаңғыртылатын энергия көздеріне байланысты мәселелерде елеулі тәжірибесі бар, әсіресе күн энергиясын пайдалану көрсеткіші 20 пайызды құрайды. Сондай-ақ Грекия ЖЭК үлесін 2020 жылға дейін 30 пайызға арттыруды жоспарлауда. Кездесу қорытындысы бойынша Жошыбаев пен Ксанфакос көрмеге қатысу шартына қол қойды.