Қарағанды облысында жедел жәрдемнің бірыңғай диспетчерлік қызметі жобасы қолға алынды. Бұл туралы облыстық денсаулық сақтау басқармасының басшысы Ержан Нұрлыбаев мәлім етті.
Ведомство басшысы электронды денсаулық сақтауды дамытудың қадамдарына тоқталды.
– 2017 жылдың қаңтарынан бастап облыстық ауруханаларда «Стационар» денсаулық сақтаудың кешенді медициналық ақпараттық жүйесінің жаңа модулі енгізілуде. Жоба желтоқсанға қарай аяқталады. Осылайша, барлық медициналық ұйымдар бірыңғай ақпараттық алаңда жұмыс істейді, бұл электронды денсаулық сақтау төлқұжатын сәтті енгізу мен міндетті әлеуметтік медициналық сақтандыру жағдайында жұмыс істеуге көшу үшін негіз болады. Келесі қадам жедел жәрдемнің бірыңғай диспетчерлік қызметін құру болады, – деді Е.Нұрлыбаев.
Яғни, барлық шақырулар бірыңғай ақпараттық жүйеге енгізіледі. Жедел жәрдем машиналары GPS-навигаторлармен жабдықталады. Бюджеттен 36 реаномобиль сатып алуға 1,2 млрд теңге бөлінбек.
Сонымен қатар Е.Нұрлыбаев Қарағандыда жедел жәрдемнің жаңа үш шағын стансасын салу туралы шешім қабылданғанын жеткізді. 2017 жылы жобалау-сметалық құжаттар әзірлеуге қаржы бөлініп, құрылысты 2018 жылы бастау көзделген.
«Екі шағын стансаның бірі Майқұдық аумағында, екіншісі Сұрыптау кентіне орналасады. Аталған жобаны жүзеге асыру шұғыл көмекті жақсартуға мүмкіндік береді, деп атап өтті облыстық денсаулық сақтау басқармасының басшысы.
Мирас АСАН,
«Егемен Қазақстан»
ҚАРАҒАНДЫ