Биыл су тасқынына қарсы «Көктем-2017» республикалық командалық-штабтық оқу-жаттығуы Қостанайда өтті. Наурыз-сәуір айларында күннің күрт жылынуына орай еріген қардан өзен-көлдерде су тасып, оған жақын орналасқан елді мекендерге, мемлекеттік маңызы бар нысандарға, жолдарға қауіп төндіруі мүмкін. Сондықтан, оқу-жаттығу жұмыстары төтенше жағдай туған күнде тығырықтан шығуға, құтқару жұмыстарына азаматтық қорғаныс жүйесі мен жергілікті атқару органдарын жұмылдыруды көздейді.
«Көктем-2017» республикалық командалық-штабтық оқу-жаттығу аясында Ішкі істер министрінің орынбасары Юрий Ильин келіп, Қостанай облысының әкімі Архимед Мұхамбетовпен кездесті. Кездесу барысында өңірдің көктемгі су тасқынына дайындық мәселелері талқыланды. Олар Төтенше жағдайлар департаментінің құтқару бөлімшелерін аралады. Облыста бұл шараға 201 адам, 75 техника қатысты.
«Көктем-2017» республикалық командалық-штабтық оқу-жаттығудың екінші күні облыста бірнеше жерде жаттығу шаралары өткізілді. Дайындық шарасы шеңберінде су тасқыны кезінде болып қалуы ықтимал оқиғалардың алдын алу немесе құтқару тәсілдері жүзеге асырылды. Солтүстік аумақтық аэромобильді жедел құтқару отряды Тобыл өзенінде мұз астына кеткен адамдарды құтқарудың, машинаны шығарып алудың төрт көрінісін көрсетті. Құтқарушылар мұз жару, су тасқынынан зардап шеккендерге көмек, құтқару кезіндегі арнайы техникаларды пайдалануды жұрт назарына ұсынды. Қостанай қаласындағы шағын тұрғын аудандарда бұрынғы жылдарғы көктемгі су тасқынында қалыптасқан қиындықтарды назарға ала отырып, қарғын судың бетін бұру жұмыстары көрсетілді. Қостанай-2 шағын ауданында құтқарушылар 45 тұрғын үй мен мектепті қарғын судың тұтқынынан аман сақтап қалды. Мұндай оқу-жаттығу шаралары Қостанай қаласының Дружба поселкесінде де өткізілді. Республикалық шараға Қостанай жылу-энергетикалық және «Қостанай-Су» мемлекеттік коммуналдық қуатты кәсіпорындары да тартылды. Кәсіпорындардағы арнайы техникалармен қарғын су сорып алынып, басқа арнаға төгілді
Облыстың солтүстік жағындағы Ұзынкөл ауданында қардың қалыңдығы 43 сантиметрге жетеді. Сонымен қатар, осыған ұқсас көрініс Қарабалық, Қостанай, Науырзым, Қарасу және Әулиекөл аудандарында да байқалады. Облыстық төтенше жағдайлар департаментінің басқарма бастығы подполковник Руслан Орынбековтің айтуынша, өңірде қарғын суда қалуы мүмкін 59 елді мекен бақылауға алынған. Облыста қазір көктемгі су тасқынына қарсы қимыл үшін 829 техника, 129 жүзу құралдары, 263 су сорғыш техника, 26700 ыдыс-қап, 10 мың тоннадан астам инертті материалдар, 97 тонна жанар-жағармай дайын. Су таси қалғанда екі мыңнан астам адам құтқару жұмыстарына тартылатын болады. «Көктем-2017» республикалық командалық-штабтық оқу-жаттығу шаралары осы дайындықты пысықтай түсті.
Нәзира ЖӘРІМБЕТОВА,
«Егемен Қазастан»
ҚОСТАНАЙ