Фото: Ашық дереккөз
Оның айтуынша, Қылмыстық кодексте полиция қызметкерлеріне қарсы жасалған әрекеттер үшін жауапкершілік қарастырылған. Атап айтқанда, 380-бап «Билік өкіліне қатысты қорқыту немесе күш қолдану әрекеттері».
«Қостанайда 380-баптың 6-бөлігі бойынша үш күдікті қамауға алынды. Сондай-ақ Атырау мен Өскемен қалаларында да күдіктілер ұсталды. Қостанайдағы жағдайға келсек, қызметтен тыс жүрген полиция қызметкері ескерту жасаған кезде оған шабуыл жасалған. Қылмыскер ұсталып, қазіргі уақытта тергеу жүргізілуде», деді Санжар Әділов.
Оның айтуынша, сот санкциясымен полиция қызметкерлеріне күш қолданған барлық тұлғалар қылмыстық жауапкершілікке тартылып, қамауға алынған.
Семейде ер адам полицияның қызметтік көліктерін өртеп жіберді
Сондай-ақ ол құқық қорғау органдарына қарсы агрессияның себептері туралы сұраққа жауап берді.
«Қоғам полиция жұмысына оң көзқарас танытып отыр, «Заң және тәртіп» қағидаты толық қолдау тапты. Бұл бағытта құқықбұзушылықтардың алдын алу және оларды ашу жұмыстары жүргізіліп жатыр. Жалпы, елімізде құқықтық мәдениет жоғары деңгейде. Алайда жекелеген күш қолдану жағдайлары орын алды. Барлық күдіктілер жауапкершілікке тартылып, түпкілікті шешімді сот қабылдайды», деді ол.
Еске сала кетейік, 3 сәуірде Атырау облысында қызметтік міндетін атқарып жүрген полиция қызметкерлеріне шабуыл жасалып, салдарынан екі құқық қорғаушы зардап шекті.
Бұған дейін Қостанайда қоғамдық тәртіпті бұзғаны үшін ескерту жасаған полиция қызметкеріне мас күйдегі бірнеше тұрғын шабуыл жасағаны хабарланған болатын.
Сондай-ақ Өскеменде полиция қызметкері өзіне тиесілі қарудан жарақат алды. Полиция деректеріне сәйкес, мас күйдегі екі ер адам құқық қорғау қызметкеріне қарсылық көрсеткен.
