Сенаттың жалпы отырысында В.Редкокашин бастаған бір топ депутат Премьер-Министр Б.Сағынтаевтың атына сауал жолдады. Онда былай делінеді:
«Астана медицина университеті» АҚ пен Л.Н.Гумилев атындағы Еуразия ұлттық университетінде өткен жұмыс кездесулері кезінде аталған университет ұжымдары өңірлерден келген студенттерді жатақханамен қамту мәселесіне қатысты қалыптасқан ахуал туралы айтты.
Бүгінде елордадағы ұлттық жоғары оқу орындарында білім алып жатқан студенттердің саны 18 000 адамды құрайды. Оның ішінде тек қана Л.Н.Гумилев атындағы университетте 16 847 студент оқиды, олардың 4 561-і ғана жатақханамен қамтылған.
Астана медицина университетінде қалыптасқан жағдай одан да күрделі. Университет студенттерінің жалпы саны 6 774 адам болса, олардың 3 500-іне жатақхана керек, 2000-нан астамы жатақханаға өте зәру деуге болады (халықтың аз қамтылған бөлігінен шыққан балалар, жетім балалар, көпбалалы отбасынан шыққан балалар және т.б.).
Астана медицина университеті құрылғаннан бергі аралықта бір ғана жатақхана салыныпты. Ол Жеңіс даңғылы, 35, 35А мекенжайында орналасқан, 1974 жылы салынған ғимарат. Барлығы 980 адамға арналған.
2012 жылы университетке студенттер жатақханасын салу үшін жер телімі бөлінген. Алайда, республика бойынша бірқатар бағдарламаны қаржыландыру қысқарып, Ұлттық экономика министрлігі университетке арналған жатақхана салуды даму жоспарынан алып тастаған, жер телімі мемлекетке қайтарылған. Осылайша, аталған оқу орындарында жатақхана жетіспеушілігі өзекті күйінде қалып келеді, ал жаңасын салу бюджеттен мол қаражат бөлуді қажет етеді.
Осыған байланысты, «Астана ЭКСПО-2017» халықаралық көрмесі өткеннен кейін босаған тұрғын үйлерді Студенттер үйіне айналдыру қалыптасқан ахуалды шешудің жолы деген ойдамыз. Бұл Студенттер үйлерінде Астана медицина университетінде, Л.Н.Гумилев атындағы Еуразия ұлттық университетінде және басқа да елордалық жоғары оқу орындарында білім алатын студенттер тұрар еді».