Жүздесу

ҚҰЛПЫРҒАН  ҚҰЛСАРЫ Астанадан бастау алып, ел кө­лемінде жергілікті халықтың талап-тілегін тыңдап, барлық салада кө­мектесу үшін жолға шық­қан «Ме­нің Қазақстаным» үгіт-насихат пойызы бұр­нағы күні Құлсарыға келіп жетті.  Осы жерде Қанды­ағаштан бет алған по­йызды күтіп алушылар да көп болды. Пойызды асыға күткен халық алдында аудан әкімі Рахметолла Нұғыманов пен «Нұр Отан» ХДП бастауыш ұйы­мының төрағасы Мең­дібай Хайруллин сөз сөйлеп, жұрт­шылық атынан арнайы пойызды ұй­ым­дастырудың бастамашысы бол­ған Елбасына, бір айдан бері еліміздің әр өңірінде халықтың мұң-мұқтажын тыңдап, көмек беріп келе жатқан денсаулық, әлеуметтік қорғау, қаржы және заң саласының қызметкерлеріне алғыс сезімдерін білдірді. Иә, айтса айтқандай, төрт күн­нен бері аталған пойыздың құ­ра­мында болып, әр жерге аялдап, ха­лықтың тұрмысымен жете таны­сып, жұртшы­лыққа қолдан келгенше көмегін беріп жатқан министрліктер өкілдерінің жұмысы ел басқарып отырған азамат­тардың осын­дай  алғысына тұрарлық. Осы күні салтанатты шарадан соң, олар әдеттегідей таңертеңнен кешке дейін халыққа өз көмектерін көр­сетуді жалғастырып, іске кірісіп кетті. Мұн­да арнайы пойыз бен жылжымалы медициналық кешен және облыстың дәрігерлері аудандық ауруханада ха­лық­ты қабылдаса, басқа салалардың қызметкерлері мә­дениет үйінде зей­нетақымен қамтамасыз ету және әлеу­меттік сақ­тандыру, жұмысқа орна­ласуға көмектесу, құқықтық және заңдық кеңес беру, шағын және орта бизнесті қаржыландыру, несиелендіру бойынша кездесулер өткізді. Қабылдау бөлімдеріндегі халық санында есеп болмады. Мәселен, ау­дандық ауруханада Денсаулық сақ­тау министрлігі медициналық көмекті ұй­ым­дастыру департа­мен­тінің бас сарап­шысы Ернар Мыр­зақұловтың айтуын­ша, Қандыағаш қаласында мамандар 530 адаммен кездесіп, дәрі­герлік көмек берсе, осындағы қабыл­дауларда дәрі­гер­лер кеңес сұрап келген азамат­тардың бәріне қолда бар мүмкін­діктің бәрін жасап отырды. Ал мәдениет үйінде әлеу­меттік мәсе­ле­лерге байланысты өткен кездесуде Еңбек және халықты әлеу­меттік қор­ғау министрлігінен бөлінген маман Рау­шан Көшкінбекова азамат­тарды жұмыс­пен қамту, әлеуметтік көмек, зейнетақы мөлшеріне қатыс­ты мәсе­лелерді қарады. Осының алдында Қандыағаш қаласында оның қабыл­дауында 30 адам болған еді. Сол кездесуде министрлік ма­маны мүгедек азаматтарға 50 000 теңге көлемінде қар­жы аударып беру мәселесін шешкенін білеміз. Құлсарыдағы қабы­л­дауында да ол өзіне еңбекке жарам­сыздығына бай­ланысты көмек сұрап келген азамат­тарға, атаулы әлеуметтік кө­мек, балалар жәрдемақысы мен зейнетақыны көбей­ту, әлеуметтік сақтандыру бойынша мәселе кө­терген аудан тұрғындарына мемлекет тара­пынан берілетін жеңіл­діктердің жо­лын көрсетіп,   халық­тың өз құқық­тарын білу үшін заң кеңестерін берді. Ел Тәуелсіздігінің  20 жылдығы қарсаңында және Құлсарының қала мәртебесін алуының 10 жылдығына орай аудан орталығында да заманға сай ауқымды жұмыстардың жасалып жат­қаны көзге ұрады. Облыс әкімі Бергей Рысқалиевтің қолдауымен Құл­сарыны Атыраудан кейінгі сәу­летті де дәулетті қалаға айналдыру мақ­сатында ең алдымен ауыз су мәсе­лесін шешу қолға алынғаны көрініп тұр. Ол «Теңіз­шевройл» ЖШс-ның «Игілік» бағдар­ламасы аясында іске асырылып, жыл соңында пайдалануға берілмек. Аудан бойынша газ құбы­рын тарту, халықты көгілдір отынмен қамту жағы толық шешілген екен. Ал қаланың көшелері түгелдей асфальт­талып, тротуарлар төселіп, көшелері алқызыл гүлдермен безендіріліп, жа­сыл көшеттер бой көтерген. Қалада тіпті бұрын-соңды тас жол көрмей, мидай балшыққа батып жататын ша­ғын аудандар мен учаскелерге асфальт төселіпті. Соған тұрғын­дардың бір жасап қалғанын көруге болады.  Жер­гілікті халықты тағы бір қуан­татыны, Құлсарыда жаңа орта мектеп, жаңа мәдениет үйі, балабақша ғима­раттары пайдалануға беріліпті. Таяу уақытта екі қабатты аудандық емхана құрылысы аяқталмақ. Осын­дағы өкпе аурулары ауруханасының да жаңадан салынып, пайдалануға берілуі көп мәселенің шешімін табуына себеп болары сөзсіз. Атырау облысы. * * * БЕРЕКЕЛІ БЕЙНЕУ Кеше аудан орталығы – Бейнеу селосының темір жол вокзалында пойыз делегациясын күтіп алған халықтың санында есеп болмады. Сал­танатты шарада үлкен жолға шық­қан азаматтарға деген халықтың жылы­лығы, қуанышы сезіліп тұрды. Осы жерде пойызды асыға күткен жұртшы­лықтың алдында аудан әкімі Басшы Әзірханов, Ұлы Отан соғысының ардагері Дүйсен Көшеров сөз сөйлеп, Астанадан ат терлетіп келген қауымға ризашылықтарын білдірсе, «Нұр Отан» ХДП-ның Астана қалалық филиалы әлеуметтік бастама­ларды талдау және болжау орталы­ғының меңгерушісі Қазбек Қазыкенов арнайы пойыздың мақсат-міндетін айтып өтті. Бейнеу ауылында арнайы сала мамандары қатысқан қоғамдық қабыл­даулар жоғары деңгейде өтіп, халық­тың да, пойыз делегациясының да көңілінен шықты. Биыл ауданға 39 жыл толады екен. Қазір Бейнеу ауы­лы­ның кірпіші қаланған кезден бері ауыз толтырып айтарлықтай жұмыс­тар­дың істелінгені көрініп тұр. Ауданда 53 000 адам тұрса, Бейнеу ауы­лында халықтың саны 35 000-нан асады. Осы жерде аудан әкімі Басшы Әзірхановтың 20 жылдан бері атқар­ған жұмысын атап өту жөн. 1991 жылы әкім болып келгелі бері Басшы Айжанақұлы біраз шаруаның ба­сын қайырыпты. Бүгінде бұл аудан әлеуметтік-экономикалық, халықтың тұрмыстық деңгейі жоғары өңірлердің бірі саналады екен. Сон­дықтан да оны жұрт­шылық берекелі Бейнеу деп тегін айтпаса керек. Ауданда негізінен мұнай-газ саласы жақсы дамы­ған. Халықтың бәрі жұ­мыс­пен қамтылған. Ал ауылдың тыныс-тіршілігі ерекше. Көшелер толығы­мен асфальтталып, безендірілген. Бір атап өтетін нәрсе, қазір Бейнеу ауданы Маңғыстау облысы бо­йын­ша білім беру саласында бірінші орында тұр. Аудан орталығының өзінде 11 білім ордасы жұмыс істейді. Соның ішінде лицей оқушылары соңғы 10 жылда 24 алтын белгіні иеленсе, 2008-2009 жылдары Чехия­ның Прага қаласында  өткен халық­аралық ғылыми жобалар байқауында ағыл­шын тілінен күміс медаль, биология пәнінен қола медаль, 2009-2010 жылы Кипр Республикасында Салтанат Ордабаева есімді оқушы ағылшын тілінен жеңімпаз болыпты. 2010-2011 оқу жылында Венгрия­ның Будапешт қаласында өткен байқауда биология пәнінен Рахым Байбоз алтын медальды жеңіп алған. Бейнеу ли­цейінің директоры Таңат Амал­баевтың ай­туын­ша, білім орда­сының оқушылары республика­лық пәндік олимпиадаларда 2008-2009 және 2009-2010 оқу жылында құқық пәні бойынша Әлішер Тағаберді екі жыл қатарынан алтын медальға және тарих пәнінен Нұрбек Сағидоллаев күміс медальға ие болған. 2010-2011 оқу жылында құқық пәні бойынша Әлібек Таға­бердин мен қазақ тілі пәнінен Әсел Асанова күміс медаль­ды иеленді. Осы аудандағы Бейнеу гимназиясының оқушысы Азат Мұхамедиев 2010-2011 оқу жылында республикалық пәндік олимпиадада тарих пәнінен алтын медальға ие болып, еліміздегі білім сатысының ең жоғарғы көрсеткішінің иегері атанды. Маңғыстау облысы. Дастан КЕНЖАЛИН.