Адамгершілік олимпиадасы

Алматы қаласындағы «Бөбек» ұлттық ғылыми-практикалық білім беру және сауықтыру орталығында болашақ ұрпақтың рухани дүниесі бай, бақытты және жан-жақты дамып өсуіне арналған «Биік ойлар аспаны» атты «Өзін өзі тану» пәні бойынша республикалық олимпиада өтті. Олимпиадаға Қазақстанның он төрт облысынан, Астана, Алматы қаласынан (қала мектептерінің құрама, Назарбаев зияткерлік мектептерінің, «Өзін өзі тану» гим­назиясының командалары) 101 оқушы қатысты. Аталмыш шараның негізгі мақсаты – оқушы­лардың шығармашылық әлеуетін дамыту, тұлғалық қасиет­терін, азаматтық ұстанымын көрсе­ту, өзін өзі жетілдіруге және тануға ұмтылысын қолдау арқылы балалар мен жасөспірімдерге рухани-адамгершілік білім беру. Тәуелсіздік Қазақстанның және ондағы көпұлтты халықтың тарихына түбегейлі өзгерістер әкелді. Осылай, 2010 жылы еліміздің білім беру жүйесіне «Өзін өзі тану» пәні енгізілді. Бұл – білім беру үдерісіндегі үлкен жетістік. Білім беру жүйесі бүгінгі қоғам мен адамға маңызды болып табылатын өз-өзімен және қоршаған ортамен үйлесімді өмір сүретін тұлғаның дамуына бағытталуы тиіс. Осы орайда, жас ұрпақтың рухани мәдениетін арттырып, көр­кемдік әлемін байытуда, дүние­танымын қалыптастырып, саламаттылыққа тәрбиелеуде «Өзін өзі тану» пәнінің орны ерекше. Бұл пән жеке тұлғаның өзін өзі тануына және рухани баюына әсер ете отырып, әрбір тұлғаның жақсы жаққа өзгеруіне мүмкіндік береді. Сонымен қатар, ол жеке тұлға ретінде өзін өзі тануға және өмірлік ұстанымын, дүние таным­дық деңгейін анықтайтын құн­дылықтар сапасына ие болуға бағыт-бағдар береді. «Өзін өзі тану» рухани-адамгершілік білім беру бағдарламасының авторы Сара Алпысқызы Назарбаеваның сөзімен айтсақ: «Жалпыадамзаттық құндылықтардың мәнін ашатын, қарапайым адамгершілік нормалары болып табылатын жауап­кершілікті сезіну, ар-намысты сақтау, махаббат пен жанашырлық таныту, риясыз жақсылық жасай білу негізінде баланың өзіндік тұлғасын қалыптастырып, дамыту – білім беру мен тәрбиелеудің негізгі өзегі болуға тиіс. Біздің басты міндетіміз – аталған құнды­лықтарды балаларымыз бен жас­өспірімдердің басқа тұлғалар­мен, қоршаған ортасымен, бар әлеммен байланыс жасау қажет­ті­лігіне айналдыру. Міне, осы та­лап­тарға «Өзін өзі тану» руха­ни-адамгершілік білім беру бағдар­ламасы жауап береді». Олимпиада нәтижесі бойынша 25 қатысушы бірінші дәрежелі дипломға, 51 қатысушы екінші дәрежелі дипломға, 25 қатысушы үшінші дәрежелі дипломға ие болды. Әсіресе, Ақтөбе, Батыс Қазақ­стан, Жамбыл және Қызылорда об­лыс­тарының, Алматыдағы «Өзін өзі тану» гимназиясының оқу­шылары үздік нәтижелер көрсетті. Нұргүл ӘРІНОВА, «Бөбек» орталығының ғылыми қызметкері