Шығарма арқауы – тәуелсіздік

Кеше Орал қаласындағы Достық үйінде аймақтық қоғамдық кеңес пен облыстық білім басқармасы бірлесіп ұйымдастырған мектеп, колледж және кәсіптік техникалық мектеп оқушылары арасында тәуелсіздік тақырыбына жазылған шығармашылық жұмыстардың қорытындылары шығарылды. Бұл жөнінде аймақтық кеңестің сараптамалық-талдау бөлімінің бас кеңесшісі Айсұлу Мұқатаева газет тілшісіне былай деп хабарлады. Шығарма жұмыстарын жазуға облыстағы орта мектептердің 7-11 сыныптарында және колледждер мен кәсіптік-техникалық мектептерде білім алатын оқушылар қатысты. Шығармаға қазақ мектептерінде оқитын өзге этнос өкілдерінің ұл-қыздары да қатысып, бақ сынады. Осы қауырсын қанат шығарма иелерінің арасынан 8 жұмыс іріктеліп алынып өңірлік кезеңнің жеңімпаздары деп танылды. Олардың бәріне ұйымдастырушылар атынан марапаттау қағаздары тапсырылды. Біз осы конкурста шығармасы үздік деп танылған Орал технологиялық колледжінің оқушысы Екатерина Вологинаны сөзге тартқан кезде ол бізге жазған жұмысының жоғары бағаланғанына өте қуанышты екенін жеткізді. Тәуелсіздік – біздің ең басты құндылығымыз. Ал Қазақстан – бәріміздің ортақ отанымыз. Егемен еліміздің одан әрі өсіп-өркендеуіне өз үлесімізді қосуды басты парызымыз деп санаймыз. Біз өз елімізді мақтан етеміз. Оның бір кірпіші болып қалануға әзірміз. Мен шығармамда тәуелсіздік жөніндегі осы ой-пікірлерімді жазып көрсеткен едім. Бұл еңбегім қазылар алқасы тарапынан үздік деп танылған екен. Мен бұған шексіз ризамын деді республикалық конкурстың өңірлік кезеңінің жеңімпазы. Темір Құсайын, «Егемен Қазақстан» ОРАЛ