«Барыс» «Амур» командасынан басым түсті

Құрлықтық хоккей лигасының тұрақты чемпионатында Астананың «Барысы» өз айдынында «Амур» командасын қабылдап, 2:1 есебімен басым түсті. Матчтың алғашқы кезеңінде барынша шабуылға көңіл бөлген айдын иелері 8-минутта есеп ашты.  Найджел Доус бағыттаған соққы көздеген жерден дәл табылды. Бұл тұста «Барыстың» ойыншы басымдығына ие болғанын айта кеткен жөн. Кездесудің екінші кезеңінде қос команда қауіпті шабуылдар ұйымдастырғанмен, гол соғылмады. Соңғы 20 минутта қонақтардың белсенділігі байқалды. Ойынның аяқталуына 8 минут қалғанда Теему Рамстедт мергендігімен көзге түсіп, есепті теңестіріп кетті. Негізгі уақыттың соңына дейін осы есеп сақталып, жеңімпаз овертайм арқылы анықталды. Бұл сында Эдуард Занковец шәкірттерінің бірі Владимир Меркелов жеңіс шайбасын соқты. Осылайша, 33 ойыннан кейін 47 ұпайы бар «Барыс» «Шығыс» конференциясында 8-орынға қайта көтерілді. Келесі кездесуін 30 қараша күні Мәскеуде жергілікті «Динамо» командасымен өткізеді.