Семей орталықтандырылған кітапханалар жүйесінде «25 жұлдызды күн» шарасы аясында ел Тәуелсіздігінің 25 жылдығына арналған
«Біз – ядролық қарусыз әлем үшін» атты экология сағаты өтті.
«Авиценна» колледжінің студенттері қатысқан шара барысында кітапхана қызметкерлері биыл Қазақстанның Тәуелсіздік алғанына 25 жыл толуымен бірге, Семей ядролық сынақ полигонының жабылғанына да ширек ғасыр болғанын атап өтті. Семей полигонының әлемдік деңгейдегі ұлттық қасірет екенін әңгімелеген кітапханашылар қауымы ажал аранының алғашқы құрылу тарихынан бастап, оның ауыр салдары мен зардабы жөнінде баяндады.
Ядролық сынақ алаңы кешегі Абай мен Мұхтардай алыптардың жасыл жазиралы туған жері болған бүтіндей Семей аймағына ұзақ уақытқа созылатын радиациялық сәулесімен өшпес қасірет алып келгенін айтқан кітапхана қызметкерлері осынау 40 жылға созылған қасірет қақпанынан құтқарған 1991 жылғы Елбасы Нұрсұлтан Назарбаевтың Семей полигонын жабу жөніндегі Жарлығы болғанын атап өтті. Сондай-ақ, «Невада-Семей» антиядролық қозғалысының да елеулі үлес қосқанын жеткізді.
Экологиялық сағат барысында оқушылар жаппай қырып-жоятын ядролық қарудан бас тартып қана қоймай, оны әлем елдері арасында насихаттауымен антиядролық қозғалыстың көшбасшысына айналған қазақстандық бастамалардың авторы – Елбасы Нұрсұлтан Назарбаевтың бейбітшілікке үндеген саясаты жөнінде ой-пікір алмасты. Шара соңында оқушылар «Біз – ядролық қарусыз әлемді қалаймыз!» тақырыбындағы кітап көрмесін тамашалады.
Бұған дейін Абай атындағы кітапхана қызметкерлері қалалық ішкі істер басқармасында «Елбасымен нұрлы болашаққа» атты көрме мен слайд-дәріс өткізген болатын.
Думан АНАШ,
«Егемен Қазақстан»
СЕМЕЙ