Елбасы еңбегіне арналған көрме

Абайдың «Жидебай-Бөрілі» мемлекеттік тарихи-мәдени және әдеби-мемориалдық музейінде Тұңғыш Президент күніне арналған «Ұлы Дала ұлағаттары» экспозициялық көрмесі ашылды. Көрмеге Елбасы Н.Ә. Назарбаевтың жақында «Егемен Қазақстан» газетінде жарияланған «Ұлы Дала ұлағаттары» туындысы арқау етіп алынған. Елбасы еңбегінің желісі бойынша ұйымдастырылған «Ұлы Дала ұлағат­тары» көрмесі «Туған елім – тірегім», «Ел мен ер және жер», «Тәуел­сіздіктің тал бесігі», «Туған тіл­дің тұғыры», «Қиырдан келсе қан­дас­тар» және «Жаңғырып келер жас толқын», «Қарияларымыз – қазына­мыз» атты бөлімдерден тұрады. Соған орай келушілер көрме арқылы ширек ғасырда халқымыз атқарған ұлан-ғайыр жұмыстардың куәгеріне айналады. Салтанатты шарада Семей қалалық ардагерлер кеңесінің төрағасы А. Доғалақов пен құрметті теміржолшы Қ.Әлсейітов екеуі көрме шымылдығын ашты. Сөй­легендер Ұлы Дала елі – Қазақстан Республикасының қалыптасып, дүние жүзіндегі ең озық 30 елдің қатарына қосылуындағы Елбасы Нұрсұлтан Назарбаевтың сындарлы саясаты мен ерен еңбегін атап көрсетіп, халқымыздың тәуелсіздік жылдарындағы құтты қадам­дарының одан әрі қайырлы болуына тілектестіктерін білдірді. Салтанат соңында тәуелсіздік куәгер­лері – қала ардагерлерінің бір тобына Елбасының музейде кітапша етіп басып шығарылған «Ұлы Дала ұлағаттары» туындысы мен ескерткіш сыйлықтар тапсырылды. Раушан НҰҒМАНБЕКОВА СЕМЕЙ