Астанада Тәуелсіздікке арналған фотокөрме ашылды

Елорданың Тәуелсіздік сарайының ғимаратында ел тарихының әрбір жылының басты оқиғалары мен жетістіктері туралы баяндайтын «Тәуелсіздік жылнамасы - 25» фотокөрмесі ашылды, деп хабарлады Астана әкімдігінің баспасөз қызметі. Оны Астана қаласының әкімдігі «National Geographic Қазақстан» журналымен бірлесіп ұйымдастырды. Қазақ елінің соңғы ширек ғасырдағы қалыптасу кезеңі, атаулы күндері, елеулі оқиғалары мен жүріп өткен жолын еске салып, көрсететін көрмеге Қазақстан және шетелдік фотомамандардың 80-нен астам еңбегі ұсынылады. «Барлығыңызды келе жатқан мерекелермен құттықтаймыз. Қазір сарайда түрлі оқиғалар орын алып жатыр. Биыл Тәуелсіздігіміздің 25 жылдығын мерекелеудеміз. Осы мереке қарсаңында «тәуелсіздік» атауы бар осы сарайда Қазақстан жылнамасының көрмесін ашып отырмыз. Бұл жерде фотосуреттер арқылы еліміздің тарихы, табиғаты және байлығы туралы сыр шертетін 90-нан астам жұмыс қойылған», – деді Тәуелсіздік сарайының директоры Әсел Өміршина. Фототілшілер өз туындыларын бұл көрмеге қою арқылы Қазақстанның бай мәдени мұрасына, төл тарихына, ұлттық бастауына деген махаббаты мен құрметін көрсетуді алдарына мақсат етіп қойып отыр. Егемендігіміздің 25 жылдық мерейтойына арналған фотокөрме қарашаның 30-нан бастап жыл соңына дейін Астанадағы Тәуелсіздік сарайының негізгі көрме залында өтеді.