Мәжілісте Аграрлық мәселелер комитетінің мұрындық болуымен «Өсімдіктер мен жануарлар дүниесін қорғаудың, өсімін молайтудың және олардың объектілерін орнықты пайдаланудың өзекті мәселелері» тақырыбында дөңгелек үстел отырысы өтті. Комитет төрағасы Сапархан Омаров жетекшілік еткен жиынға депутаттар мен табиғатты қорғау және оны тиімді пайдаланудың әртүрлі салаларында қызмет көрсететін үкіметтік емес ұйымдардың өкілдері, салаға жауапты мемлекеттік мекемелердің мамандары қатысқан болатын.
Алқалы жиында негізгі баяндама жасаған Ауыл шаруашылығы вице-министрі Ерлан Нысанбаев орман мен жануарлар дүниесі және аңшылық шаруашылығы, балық шаруашылығы сияқты ерекше қорғалатын табиғи аумақтарды дамыту саласы бойынша елімізде қолға алынып жатқан жұмыс, жоспардың жай-күйімен таныстырды. Сөйтіп, салада қордаланған мәселелерді ортаға салып, түйінді тарқатудың тетіктерін сөз етті. Вице-министрдің мәліметінше, елімізде ормандарды молықтыру аумағы соңғы он жыл ішінде едәуір ұлғайған көрінеді.
«Орман алқаптарын арттыру, қалаларды, өндіріс орталықтарын және басқа да елді мекендерді көгалдандыру бойынша қамтылған аумақ көлемі жыл өткен сайын ұлғайып келеді. Мәселен, 2005 жылы мұндай көрсеткіш 31 мың гектарды құраған болса, ағымдағы жылда бұл көлем 55 мың гектарға жетті. Тіпті халықаралық ұйымдардың атсалысуымен Арал теңізінің құрғаған табанындағы орман мелиоративтік екпелерін құру бойынша да жұмыстарымыз жүйелі орындалуда. Осылайша, әлемдік тәжірибелерге сүйене отырып, жүзеге асырып жатқан жоспарларымыз әлі де өз жалғасын табатын болады», деді Ерлан Нұралыұлы.
Орайы келгенде, мұндай іске Мемлекет басшысының өзі өте белсенді қолдау білдіріп отыратындығын да айта кеткен жөн. Өйткені, елді мекендер айналасында жасыл аймақтарды құру мен көгалдандыру шараларын жүргізу нәтижесінде, 1998-2016 жылдар аралығында Астана қаласының аумағында 75 мың гектар ағаш егілген.
Қазір Қазақстандағы жасыл желектендіру қарқынын бәсеңдетіп алмау үшін Ауыл шаруашылығы министрлігі тарапынан бірқатар тегеурінді шешімдер қабылдау қарастырылуда. Айталық, орман саласын қолдау мен сауықтыру мақсатында жұмыр ағаш материалдарының экспорты мен сексеуіл алқаптарындағы ағаш кесулердің барлық түрлеріне мораторий жариялау, сонымен қатар, өртеңдерді пайдалану мен қылқан жапырақты ормандарда санитарлық ағаш кесулерге сөзсіз қатаң тыйым салу қажет көрінеді.
Өзен, көлдердегі балықтар мен өсімдік атаулыны қорғауды және тиімді пайдаланудың амал-әрекеттері жан-жақты талқыланған жиында сөз болған өзекті мәселенің бірі – Қазақстандағы киіктердің жай-күйі болды. Вице-министрдің баяндамасында осы күндері еліміздегі киіктер 108 мың басты құрап отырғандығы айтылып, өткен жылы Қостанай, Ақтөбе, Ақмола облыстарында жаппай қырылған киіктердің саны мен оның негізгі себебіне де тоқталып өтті. «Өкінішке қарай, елімізде соңғы жылдары киіктердің жаппай қырылуы тіркелген болатын. 2010-11 жылдары Батыс Қазақстан облысында – 11 920, 2012 жылы Ақмола облысында – 926 киік, ал 2015 жылы жоғарыда аталған үш облыс аумағында 150 мыңнан астам бетпақдала популяциясы киіктерінің өлексесі көмілді. Олардың санының кемуіне бірден-бір әсер ететін фактор – пастереллез аурулары болып табылады», деді Е.Нысанбаев.
Айта кетейік, отырыста жануарлар дүниесін қорғап, пайдалану мәселесіндегі кейбір заңнамалық проблемалар жайында «Қансонар» республикалық қауымдастығының бас директоры А.Бербер арнайы баяндама жасаса, елімізде жануарлар мен өсімдіктер дүниесін зерттеу және сақтау жөнінде «Қазақстанда биологиялық әртүрлілікті сақтау қауымдастығы» ҚБ атқарушы директоры В.Воронова орамды ой айтты. Сонымен қатар, осы салаға қатысты тиісті заң талаптарын бұзғандарды анықтау мен жазалау турасында Ішкі істер министрлігінің өкілі М.Қоржынбаев сөз сөйлеп, халықаралық тәжірибе негізінде жануарлар дүниесін орнықты басқару ісіне қатысты БҰҰ Даму бағдарламасының биоалуандық және экожүйелер саласындағы жоба менеджері Т. Кертешев баяндады.
Нұрлыбек ДОСЫБАЙ,
«Егемен Қазақстан»