Біздің шегенделген шекарамыз, бабаларымыздан мирас болып қалған байтақ даламыз, дархан қазақтың маңдайына Құдай бере салған Президентіміз бар. Ел Тәуелсіздігінің жиырма бес жылдығы өз алдына, Қазақстан жұртшылығы үшін үлкен қуаныш, айрықша мереке. Жер бетінде төл рәміздері, төл теңгесі жоқ қаншама халық бар десеңші.
Төрт ұлдың анасы, алты немеренің әжесі ретінде айтпағым мынау еді, қараша айының екінші аптасында теледидардан жаңа банкноттың шыққанын көрдік. Отбасымызбен қуанғанымызды несін жасырайын. Сол мезетте егемендігіміздің алғашқы жылдары ойыма оралды. 1993 жылдың 13 қарашасында қолданысқа енгізілген бір теңге есіме түсті. Онда өзіміздің Отырардан шыққан әлемнің екінші ұстазы әл-Фараби бабамыз бейнеленген еді. Төл валютамызды қолымызға ұстап, шат-шадыман күй кешкеніміз қалай естен шықсын?! Міне, сол оқиғадан бері де жиырма үш жыл сырғып өте шықты.
Бүгін біз Елбасы Нұрсұлтан Назарбаевтың бейнесі енгізілген банкнотты көріп отырмыз. Мұны да дербес елдің тарихындағы ерекше оқиға дер едім. АҚШ-тың тұңғыш президенті Вашингтонның да бейнесі олардың долларынан көрініс тапқан. Ал біздің Көшбасшымыздың бейнесі – төл теңгемізде. Және мұның тұп-тура 1 желтоқсан – Тұңғыш Президент күнінде қолданысқа енгізілуі – нұр үстіне нұр жауғаны да!
Мен жалақымды алғанда тарихи маңызы зор бұл банкнотты өз немерелерім мен оқушыларыма міндетті түрде көрсетемін. Жаңа теңгенің мәні мен маңызы жайында түсіндіріп айтатын боламын. Рас, біздің Мемлекет басшысының тәуелсіздік жылдарындағы еңбегін, халықтың өрлеуіне, өркендеуіне қосқан үлесін, ұлттар достастығын нығайтуға сіңірген ерік-жігерін, маңдай терін, қандай шешен болсақ та, жеткізу қиын. Сондықтан да он жеті миллион халықтың оған деген құрметі мен ізеті бөлек. Сондықтан да аналық пейілмен төл теңгеміздің тұғырлы болуын тілеймін.
Озипа Молбосынова,
Шымкент қаласы №97 орта мектебі қазақ тілі және әдебиеті пәнінің мұғалімі