400 мың түп раушан Ресейге экспортталды

Екібастұзда раушан гүлдерінің 400 мың түбі Ресейге экспортталды, деп хабарлады pavlodarnews.kz. Жылыжай кешенінің директоры Аймағанбет Сәрсенбекұлының айтуынша, қазір бұл жерде айына 600 мың түп гүл алынады. Оның 60 пайызы соңғы екі айдан бері Ресей еліне жеткізіле бастаған. Әсіресе, Мәскеу, Краснодар, Омбы, Новосібір аймақтарынан сұраныс көп. «Тапсырыс берушілерді ең алдымен, гүлдің ұзақ уақытқа сақталу қасиеті мен тиімді бағасы қызықтырады. Қазақстан бойынша гүл нарығын жаулап алдық десек болады. Батыс өңірлерден басқа, Оңтүстік, Солтүстік, Орталық Қазақстанды осы раушан гүлдермен қамтимыз. Алайда Батыс Қазақстанға жеткізу әзірге қиынға соғып тұр. Алдағы уақытта бұл мәселе де шешімін табады. Қазір раушан гүлдердің қосымша тағы алты түрін отырғызамыз. Бұл – «авалани», «биколор», «шерпа» атауына ие қызыл, ақ, сары және аралас гүлдер. Сұраныстың артуына байланысты келесі жылы тағы 5 га аумаққа кеңею жоспарда бар. Қазір кәсіпорында 70-ке тарта адам жұмыс істейді», – деді инвестор. Айта кетерлігі, кешен биыл ақпан айында іске қосылған. Жобаға 3,2 млрд теңге инвестиция құйылды. Голландиялық технологиямен салынған жылыжайдың аумағы 5 га құрайды. Болат Нұржанов атындағы «Екібастұз МАЭС – 1» ЖШС-нің жанында ашылған жылыжай электр қуатын арзан бағамен осы станциядан алады. Голландиялық раушан гүлінің 20-ға тарта түрі арнайы минералды мақтада тамшылатып суару тәсілімен өсіріледі. Оның ішінде «Red naomi» сұрыбы жоғары сұранысқа ие.