Еліміз Вьетнамға алғаш рет астық жөнелтеді

Еліміз Вьетнамға астықтың алғашқы 700 тоннасын жөнелтуді жоспарлап отыр. Бұл туралы бүгін Орталық коммуникациялар қызметінде Ауыл шаруашылығы вице-министрі Гүлмира Исаева мәлімдеді. «Қазіргі уақытта біздің ҚХР-дағы елшілікпен, «KAZNEX INVEST» агенттігінің өкілдігімен және «Қазақстан темір жолы» АҚ-мен бірге, Вьетнамға қазақстандық бидайдың алғашқы партиясын жіберу бойынша жұмыстар атқарылып жатыр. Бұл өз кезегінде Қытайдың Ляньюнгань портындағы біздің терминалдың салынуының арқасында мүмкін болды. Ол онда біздің астықты сақтауға қажетті қоймалармен қамтамасыз етілгендіктен, қазақстандық астықтың партиясын құра аламыз. Айта кетерлігі, біздің бидайдың құрамында балауыз деңгейі жоғары болғандықтан, шетелдік нарықта өте үлкен сұранысқа ие», - деді Исаева. Вице-министрдің мәліметтеріне сәйкес, 2016-2017 жылғы маркетингтік жылы бастырылған астықтың алғашқы салмағының жалпы көлемі 23,7 млн. тоннаны құраған. «Біз биыл 9 млн. тонна астықты шетелге экспорттауды мақсат етіп отырмыз. Келесі жылдан бастап, егістік алқаптардағы дәнді-дақылдардың алуандығына үлкен мән бермекпіз. Біздің астық негізінен Өзбекстан, Тәжікстан, Ресей Федерациясы, Иран және Қытай елдеріне экспортталады», - деді вице-министр.