Астананың Тәуелсіздік алаңының төріне орнатылған «Қазақ Елі» монументіне келген қонақтарымыздың бас имейтіні жоқ. Елордамызда әр кез болатын үлкен іс-шараның барлығы осы Тәуелсіздік алаңында өтетіні белгілі. Еңсесі биік тұғырға орнатылған, қанатын жайған даланың алып құсы алтын Самұрық құсымызды ұқсата білген Сембіғали Абзалбекұлының сұңқар шабытынан туған осындай баға жетпес туынды тәуелсіздігіміздің символына айналды.
Қазақта «Сегіз қырлы, бір сырлы» деген қанатты сөз бар. Қазақстаның еңбек сіңірген қайраткері, Бельгиядағы «Интернационал суретшілер одағының» мүшесі, «Бүкіл әлемнің бейбітшілік суретшісі», Еуропарламенттің «Өнер кавалері» орденінің иегері, профессор Сембіғали Смағұлов – өзі туралы көпке сырын аша бермейтін, көп жұмыс жасайтын жанның бірі.
Оның қолынан шыққан бейнелеу өнерінің алуан түрлі монументті көркем бейнелерін, мүсіндерін, Қазақстанның көп жерінен кездестіресіз. Монументті өнер туындылары елордамыз Астананың төрінде мемлекеттік және әлемдік маңызға ие ғимараттарда: «Астана Опера», «Салтанат Сарайы», «Думан» ойын-сауық орталығы, «Алжир» музейінде тұр. Халықтың қазынасына айналған жүзден аса өнер туындылары жұрттың ерекше назарын аударып келеді.
Қылқалам иесінің туындыларын қарап отырсаң, қазақ халқына тән салт-дәстүр мен батырлықты байланыстыра білгенін байқайсыз. Бұл – оның шеберлігінің, талантының, жанкешті еңбегінің арқасында ұшталған қолтаңба. Өнерді өміріне серік еткен суретшілер қауымы жүріс-тұрысымен, киім киісімен кейде ашылмайтын қазынадай, шешілмейтін жұмбақтай көрінеді. Өнер адамдарының, әсіресе, суретшілердің қай-қайсысы да жан дүниесін бірден ашып, бойлата бермейді. Сембіғали да солай. Ойында тек шығармашылық. Іздесең күндіз-түні шеберханасынан табылады. Бастаған ойын шашыратып алмау үшін көпшілікке көп бара бермейтін жанның бірі.
Жуырда «Бабалар аңсаған Тәуелсіздік» көрмесіне арнайы жазған, әлі бояуы кеппеген үлкен туындысының аты айтып тұрғандай, сомдалған «ҚҰНАНБАЙ» образына қарап, алып Абайды дүниеге әкелген әкені байқайсың. Бұл суреттен әр адам өзінің рухани байлығын кеңейтуге, жан дүниесінің жұмбақ сырын ұғуға ұмтылады. Кесек-кесек реңдік әсерлерді айқындау, бояуларды үйлестіру арқылы Құнанбай образын ашып, оның қайрат-қажырын, Абайдың әкесі дерлік ақыл-парасатын, азаматтық біртуарлығын көрсете білген.
«Қазақ Елі» монументі Қазақ елінің өткені мен бүгінін топтастыруға тырысқан композициялық мазмұны мол кешен ғана емес, ал халық рухының мәңгілігін, мемлекеттің тұтастығын, іргесінің беріктігін аңғартатын белгі. Ертеңгі ұрпаққа «Қазақ Елі» монументі мен Қазақстан Республикасы Тәуелсіздігінің 25 жылдығы бірдей қымбат боларына да сеніміміз мол.
Осылайша дүйім жұрттың алдында шымылдық түріп, бас шаһарымыздың шырайын келтірген, өзінің төрт құбыласына әлеуметтік, экономикалық, саяси және рухани құндылықтарды теңдей тоғыстырған алып кешен тәуелсіз елдің зор мүмкіндіктерін, ішкі әлеует-қуатын әлі талай паш ете бермек.
Алда «Қазақстан Тәуелсіздігі» монументі асқақтауы керек. Сан қырлы өнер иесінің бұған да өз үлесін қосарына күмән жоқ. Себебі, Сембіғали Смағұлов өнердің осы ғажап саласында халқымыздың қормал қасиеттерін айшықтай отырып, Тәуелсіздігіміздің, ұлттық тарихымыздың жыршысына айналған адам.
Рысбек АСҚАРҰЛЫ
АСТАНА