22 Қыркүйек, 2011

Қоршаған орта қолдауға мұқтаж

11910 рет
көрсетілді
3 мин
оқу үшін
Кеше елордада ашылған «Еуропа үшін қоршаған орта» атты VII Жалпы­еуро­па­лық қоршаған ортаны қорғау министрлері конференция­сы­на қатысушы делегаттар Ас­та­надағы «Атамекен» этно-мемориалдық кешен жанын­дағы «Экологтар аллея­сын­да» ағаш отырғызды.    Аллеяға ағаш отырғызу дәс­түрлі шараға айналып отыр. Өт­кен жылы біз Азия және Тынық мұхиты аймағының Қоршаған ортаны қорғау министрлері кон­фе­ренциясы аясында осыған ұқ­сас акция өткіздік. Ол жасыл өс­кін­нің тек Қазақстанда емес, әлем­де де көбеюін мақсат тұта­ды, деді журналистерге берген сұхбатында Қоршаған ортаны қорғау вице-министрі Руслан Бөл­тіріков. Акцияға Польша, Венгрия, Қырғызстан және басқа да елдерден келген делегация басшылары қатысты. Елордада ашылған «Еуропа үшін қоршаған орта» атты министрлердің жетінші конференциясына бірқатар мемлекеттерден 1 мың 300-ге жуық өкіл қатысуға ниет білдірді. Негізінен онда Еуропа елдерінің мамандары болады, деді вице-министр. Түстен кейін Тәуелсіздік са­райында «Еуропа үшін қоршаған орта» атты 7-ші министрлер кон­ференциясының жұмысы бастал­ды. Өткен жылы Астанада өткен Азия мен Тынық мұхиты айма­ғының қоршаған ортаны қорғау және дамыту министрлерінің 6-шы конференциясында Қор­ша­ған орта және оны дамыту жө­ніндегі декларация, сондай-ақ Астананың «Жасыл көпір» атты бастамасы қабылданған болатын. Бұл бастаманың негізгі мақсаты экономикада «Жасыл даму» сая­сатын алға жылжытуда Еуропа, Азия және Тынық мұхиты елдеріне қолдау көрсету болып та­былады. 7-ші министрлер конферен­ция­сының ашылу барысында Бірінші вице-премьер Өмірзақ Шө­кеев Елбасы Нұрсұлтан Назар­баевтың үндеуін оқып берді. «Біз өзіміздің бастамамызды нақты істермен дәлелдеп отырамыз. Ас­та­налық «Жасыл көпір» баста­ма­сын көпшілікке таныстырдық. Оны кореялық «Жасыл даму» бас­тамасын әрі қарай дамыту жолы ретінде қарастырдық. Бү­гін­гі конференция барысында біз жасыл экономикаға көшу бой­ын­ша өңірлік негізгі тетіктердің бірі болатын «Жасыл даму» әріп­тес­тік бағдарламасын қарастыруды ұсынамыз», – делінген Мемлекет басшысының сөзінде. Елбасы үндеуінде тәжірибе алмасу, таза технологиялармен алмасу тетіктерін құру, жасыл экономикаға көшу үшін бірлескен инвести­ция­лар мен тиісті жобалар, сон­дай-ақ экожүйені сақтау шара­ла­ры осындай ынтымақтастық аясын­да іске асырылуы тиіс екендігі айтылған. Конференция арасында Қор­ша­ған ортаны қорғау министрі Нұрғали Әшім журналистермен әңгіме барысында елімізге ай­нал­малы сумен қамтамасыз ету­дің еуропалық стандарттарын ен­гізу туралы ойларымен бө­лісті. Осыған байланысты ар­найы заң жобасын біз Мәжіліске биыл ұсын­ғымыз келген, алайда бір­қа­тар мәселелер туындап отыр, – деді ол. Айналмалы сумен қамта­ма­сыз етудің мақсаты пайда­ла­ныл­ған суды табиғатқа таза күйін­де қайтару болып табы­лады. Еуропада бұл жүйе әлде­қашан қолданысқа енгізілген, біз де осыны қуаттағымыз келеді,  деді министр. Ол сон­дай-ақ, көр­шілес мемлекеттерге трансше­ка­ра­лық өзендерге бай­ла­нысты БҰҰ тетіктерін пайда­лануды ұсы­нып отырғандығын мәлімдеді. Венера ТҮГЕЛБАЙ.