Соңғы қоңырау басталған кездегі үш толқын ұрпақтың: ата-аналар мен ұстаздардың, оқушылардың жүздеріндегі алаулаған шаттықты, көздеріндегі шуақты нұрды, көңілдеріндегі алабұртқан сезімді көргенде, кімнің де болса жан дүниесі толқымай тұра алмайды. Әсіресе, тәуелсіз еліміздің Әнұранын айтқанда, сарбаздай сап түзеп тұрған оқушылар, оның ішінде бастауыш сынып бүлдіршіндері оң қолдарын жүрек тұсына қойып, Әнұранның сөзі мен әуенін әсем үндерімен әуелете айтқанда, зал ішін керемет бір толқын кернеп кеткені анық.
Осыдан болу керек, атам қазақтың қуанышты сәтті «Үлкенінің мыңына бергенше, баланың біріне бер» дейтіні. Тіпті, сол тұста «Бағалай білу, ең әуелі өзімізді қадірлей білу» (А.Байтұрсынұлы) үлгісін ұл мен қыз айқын көрсетіп тұрды.
Биыл еліміз бойынша 3 миллионға таяу оқушы сабақтарын аяқтаса, олардың 136 269-ы түлектер болып саналады. Бұлардың ішінде қазақ мектептерін − 90 804, орыс мектептерін − 39 334, өзге тілді мектептерді 6131 бала бітіреді екен. Осылардың ішінде ең көп бітірушілердің үлесіне келсек, 34 227 Оңтүстік Қазақстан облысының, 14 684 түлек Алматы облысының, 10 043 Алматы қаласының үлесіне тиіп отыр.
«Алтын белгіге» үміткерлердің саны 6280 түлекті құрайды. Оның 4878-і – қазақ тілді, 1288 – орыс тілді, 114 − басқа ұлт өкілдерінің тілінде білім алған үміткерлер екен. Сол секілді үстіміздегі жылы 233 мың 622 оқушы 9-сыныпты аяқтапты.
Еліміз бойынша мектеп бітірушілерге аттестат тапсыру рәсімі маусым айының 10-12-сі арасында өтетінін еске сала кетсек дейміз.
Елордадағы Райымбек батыр атындағы №50 «Қазғарыш» мектеп лицейіндегі «Сыңғырла, соңғы қоңырау!» атты мерекелік салтанатқа екі мыңға таяу оқушы қатысты. Мектеп түлектері білім кілтін 10-сынып оқушыларына тапсырды. Бұдан кейін Білім және ғылым министрлігінің өкілі Раушан Мұқышева сөз алып, қаумалаған жұртты құттықтады.
Түлектер сынып жетекшілеріне гүл шоқтарын ұсынып, алғыстарын айтса, ұстаздары 11 жыл бойы білім беріп, бозбала мен бойжеткендер қатарына бет алған шәкірттеріне сәт сапар тілеп, қимай қоштасатындарын тілге тиек етті. Сол секілді ата-аналар атынан сөз алған азаматтар да ұстаздар еңбегін жоғары бағалап, қашанда алтын ұядағы білім мен тәрбие алдағы уақытта өз жемісін беретініне сендірді.
Күміс қоңырауды 1-сыныптың 4 оқушысы соғып, олардың қолынан түлектер алып, шаттықтың құшағында ұрпақтар сабақтастығының әдемі көрінісін жұрттың көз алдынан өткізді. Осы бір сәттегі ән әуезі қалықтап, ол қоштасу вальсіне ұласты.
Мектеп директоры Роза Болатаеваның айтуынша, білім ұясын 80-ге тарта түлек бітіріп жатыр екен. Биылғы жылғы соңғы қоңыраудың ерекшелігі, санаулы күндерден кейін ашылатын ЭКСПО-2017 көрмесіне тұспа-тұс келуінде екенін тілге тиек етіп, осыған атсалысу әрбір қазақстандықтың парызы дегенді жеткізді.
Ол сонымен бірге, мектептегі жетістіктерді де жан-жақты айта келіп, оқушыларды ынталандыру мақсатында «Үркер» сыйлығы белгіленгенін, соны 8 оқушыға тапсырып тұрып, бұл үрдіс алдағы уақытта жалғаса беретінін назарға салды.
Білім ордасы өткен жылы «Үздік мектеп» атанса, жақында мұғалімдердің сабақ беру әдісі бойынша Астана әкімдігі өткізген «Үздік мұғалім-2017» байқауында қазақ тілі пәнінің ұстазы Ұлболсын Есілбаева бірінші орынды жеңіп алып, 1 млн 654 мың теңге сыйақыға ие болыпты. Мұнымен қатар, республикалық ұстаздар бәйгесіне жолдамаға қолы жеткенін де айта кетсек дейміз.
Сонымен соңғы қоңыраудың жалғасы оқушылардың жазғы демалысына, түлектердің сынақ тапсыруына, жоғары оқу орнына түсу арманына ұласатын болады.
Сүлеймен МӘМЕТ,
Суретті түсірген Ерлан ОМАРОВ, «Егемен Қазақстан»
