Аудан әкімі Ділдәбек Тәжібаевтың айтуынша, «Тарбағатайдың алтын анасы» аталатын төсбелгі осыған дейін елге еңбегі сіңген ұл-қыз тәрбиелеген елуге жуық анаға тапсырылыпты. «Аналарға қандай құрмет көрсетсек те жарасады. Тарбағатай ауданында бұрынғы Ақсуат өңірінің жұрты Мұрын анадан, ал Ақжар өңірі Мақта анадан тарайтыны белгілі. Ел қадірлеген екі анамызға ескерткіш қойып, аллея ашып, маңайын жасыл желекке айналдырдық. Қос анаға құрметіміздің жалғасы іспетті «Тарбағатайдың алтын анасы» атты төсбелгі жасаттық. Бұл төсбелгі ауданға ерекше еңбек сіңірген, иманды ұл, ибалы қыз тәрбиелеген, еңбегімен ел құрметіне бөленген аналарға беріледі.
Елбасымыз жақында жарық көрген мақаласында атап өткендей, туған жерге ту тігіп, перзенттік парызбен өскен, өнген жеріне қол ұшын созып жүрген белгілі азаматтар аз емес. Өзгелерге үлгі-өнеге болсын деп осындай азаматтардың аналарына құрмет көрсетудеміз. Мәселен, жерлесіміз Семейдегі Қазақ инновациялық гуманитарлық-заң университетінің ректоры Шырын Құрманбаева ауданға 23 грант бөлді. Бұл гранттарды біз әлеуметтік жағдайы төмен отбасылардың балаларына бөліп бердік. Туған жердің түтінінің түзу ұшуына тілекші осындай адамдарға құрметіміз арта береді», дейді аудан басшысы.
Аталған төсбелгіге ие болған аналардың бірі Ақсуаттың іргесіндегі Екпін ауылында тұратын 6 бала тәрбиелеп, 17 немере, 33 шөбере сүйіп отырған тыл ардагері, «Күміс алқа» иегері – Жамал Хасенова. 1932 жылы дүниеге келген кейуана балалық шағы өгіз мініп, жер жыртумен, тұқым себумен өткенін еске алады. «Өгіз дегенің ол уақта ат қой, қарағым. Аяғымыздан су кешіп жүріп еңбек еттік. Бір түйір бидайды бөліп жедік. Ашаршылықты да көрдік. Бәрін көрдік. Аллаға тәубе, қазір молшылық заман ғой, бәрі молынан болсын», дейді қария.
Немере-шөбересінің қызығына бөленіп отырған Жамал Хасенова мектепте 30 жылға жуық еден жуушы болып еңбек етіпті. Сексен алты жасқа келсе де санасы сергек, тың. Екпін ауылының әкімі Бейбіт Сербатыров Жамал апаның былайғы жұрт көп біле бермейтін ерекше қасиетін айтты. Апамыз жас кезінде пеш салушы болыпты. Мектептен қолы қалт еткенде ауылдастарының пешін салып береді екен. Ж.Хасеновамен 41 жыл бірге тұрған үлкен келіні Күләш Исина кейуананың қолынан келмейтіні жоқ ісмер екенін, барлық немере-шөберелерін өз қолымен аяқтандырып, бүгінде ауылдың батагөй қариясына айналып отырғанын айтты.
Аналарды ардақтаудың жарқын үлгісін көрсетіп отырған тарбағатайлықтардың ізгі тәжірибесі жүрек жылытады.
Азамат ҚАСЫМ,
«Егемен Қазақстан»
Шығыс Қазақстан облысы
