– Жол таңдамайтын машинаның әлі де жетілдіретін тұстары бар. Оның кейін қуатын молайтып, жүк тиейтін қорап жасауымызға болады, ал мына күйінде ол аңға, балық аулауға, табиғат аясында демалуға мінуге жарайды, – дейді Николай Евгеньевич.
Оның айтуынша, жол таңдамайтын машинаны құрастыру аса қиын шаруа көрінбейді. Оған ВАЗ-2103, 2106, 2101 автомобильдерінің бөлшектері негіз болған. Шынжыр табанының ішіне осы машиналардың доңғалақтарын, алдыңғы жағына «Жигулидің» дисксін салған. Кабинасының шынылары ескі «Нивадан», жүргізу бөліктерінің бөлшектері ВАЗ машинасынан бұйырыпты.
Николай Евгеньевич жұмыстан келген соң, түрлі кітаптарды ақтарады, интернеттен іздейді, одан қалды, азамат болған екі ұлы да әкесінің осы талпынысына демеу болады.
– Әкем үйде қарап отырған емес. Қора-қопсыдағы еңбекті қалай жеңілдетуді ойлайды да жүреді. Біз қазір картопты әкемнің қолдан құрастырған құрылғысын пайдаланып, тұқымды трактормен бір мезгілде жерге сіңіріп шығамыз, – дейді Николай Евгенье-
вичтің кіші ұлы Николай.
Әкелі-балалы Безбабныйлар құрастырған техникасын наурыз айының аяғында «сынақтан» өткізіпті. Ауыл сыртына шығып, қар үйілген жолдарға салған.
– Ешқандай кідіріссіз жеңіл өттік, расында, әкем құрастырған машинаға қандай жол болса да бәрібір екенін көрдік. Енді, кабинасын су кірмейтіндей, шу өтпейтіндей етіп жетілдіру, сыртын бояп, әрлеу, модельге ат беру секілді жұмыстары қалды, – дейді кіші Николай Безбабный.
Үлкен Николай Безбабный мұнымен тоқтамайтынын айтты. Ол «ауылдастардың еңбегін жеңілдететін тағы не ойлап табуға болады?» деген ойдың жетегінде жүр.
Нәзира ЖӘРІМБЕТОВА,
«Егемен Қазақстан»
Қостанай облысы,
Федоров ауданы,
Шаңдақ ауылы
